Ցրտահարություն եղել է, գնահատում ենք վնասի չափը. գյուղնախարար

Այսօր` կառավարության նիստից առաջ, ՀՀ վարչապետ Հովիկ Աբրահամյանը խնդրեց գյուղատնտեսության նախարար Սերգո Կարապետյանին` զեկուցել, ցածր ջերմաստիճանային ֆոնով պայմանավորված, ցրտահարությունների հավանականության մասին: Սերգո Կարապետյանը նշեց, որ երեկ ցրտահարություն է եղել Զվարթնոցի, Փարաքարի ու Մերձավանի հարակից տարածքներում, այսօր և վաղը սպասվում է ավելի ցածր ջերմաստիճանային ռեժիմ:

Նախարարը նշեց, որ իրականացնում են իրազեկումներ` հորդորելով գյուղացիներին` իրականացնել ծխապատում և ավանդական եղանակով պաշտպանության մեթոդներ:

«Այսօր հնարավորություն չունենք գնահատելու եղած ցրտահարության կորուստները, քանի որ վաղ է դրա մասին խոսելը: Թալինի տարածքում, Վայոց ձորի ու Կոտայքի բարձրադիր մասերում ծիրանենիները դեռ չեն ծաղկել, ուստի այնտեղ ցրտահարությունը չի սպառնում, սակայն որոշ շրջաններում եղել է ցրտահարություն, և մենք հիմա գնահատում ենք: Առաջիկայում պարզ կլինի վնասի չափը»,- ասաց գյուղատնտեսության նախարարը: