«Էրեբունի» արգելոցում հայտնաբերվել է Երևանի ամենահին փողոցը՝ շուրջ 2700 տարվա վաղեմության

Հայ-ֆրանսիական արշավախմբի հայկական կողմի ղեկավար Միքայել Բադալյանն ասաց, որ պեղումների ընթացքում առանձնակի ուշադրությամբ հետազոտվել են հետուրարտական ժամանակաշրջանի շերտերը: Աշխատանքները կենտրոնացված են եղել Խալդի աստծո տաճարում և հարակից հատվածներում: Մինչ այս համարվում էր, որ դեռևս խորհրդային ժամանակաշրջանում այստեղ հայտնաբերված սյունազարդ դահլիճը եղել է տաճարի բաղկացուցիչ մասը, սակայն հետազոտություններն ապացուցում են, որ այն կառուցվել է հետուրարտական ժամանակաշրջանում:

8-ամյա պեղումների գլխավոր բացահայտումը Խալդի աստծո տաճարի արևմտյան մասում գտնվող խճահատակով փողոցն է, որն, ըստ հնագետների, Երևանի ամենահին փողոցն է: Փողոցն ունի 30 մետր երկարություն և շուրջ 2700 տարվա վաղեմություն:

Հայ-ֆրանսիական արշավախմբի ֆրանսիական կողմի և Փարիզի հնագիտական ծառայության ղեկավար Ստեֆան Դեշամպն ասաց, որ պեղումների ժամանակ հայտնաբերվել են նաև մ.թ.ա 7-րդ դարի առաջին կեսին տեղի ունեցած երկրաշարժի հետքեր:

Մանրամասն՝ սկզբնաղբյուրում