Ես չեմ բացառում, որ նա այլ հավակնություններ ունի. Լյուդմիլա Սարգսյանը՝ Հեղինե Բիշարյանի մասին

ԱԺ ՀԱԿ խմբակցության պատգամավոր, ՎՍԴՀԿ նախագահ Լյուդմիլա Սարգսյանը Yerkir.am-ի հետ զրույցում ասաց, որ իր համար անընդունելի է ՕԵԿ խմբակցության ղեկավար Հեղինե Բիշարյանի ոճը:

Հիշեցնենք, որ Բիշարյանը երեկվա նիստում քննադատության էր ենթարկել ընդդիմության որոշ ներկայացուցիչների և կարծիք հայտնել, որ նրանք սպասարկում են իշխանության շահերը:

«Բիշարյանն ավելի շատ վարկաբեկեց ընդդիմությանը, քան ընդդիմության մյուս ներկայացուցիչները, որովհետև ուղիղ մեղադրանք ներկայացրեց ամբողջ ընդդիմությանը: Ես գտնում եմ, որ ընդդիմադիր դաշտում մրցակցությունը շատ մեծ է, ավելի մեծ, քան իշխանություն-ընդդիմություն հարաբերությունների մեջ, որովհետև բոլորն են հասկանում, որ իշխանության հետ մրցելը մի փոքր դժվար է, հետևաբար` ամբողջ մրցակցությունն ավելի շատ գնում է ընդդիմադիր դաշտում»,- ասաց Սարգսյանը՝ հավելելով, որ որևէ ընդդիմադիր քաղաքական ուժ, մյուսին հարվածելով, ավելի չի ուժեղանում և դրանով բացառում է հետագա համագործակցությունը: «Ես դա ազնիվ չեմ համարում»,- ասաց պատգամավորը:

Նա չի բացառում, որ Բիշարյանն այլ հավակնություններ ունի: «Հատկապես որոշ քաղաքական ուժերի ճանապարհին շատ լավ ծանոթ եմ, ոչինչ չեմ բացառում, բայց ես ինքս այդ վարքագծի մարդ չեմ եղել և համարում եմ, որ կշիռ պետք է ձեռք բերես քո տեսակով ու վարքագծով, ոչ թե` ուրիշներին հարվածելով»,- նշեց Սարգսյանը:

Արձագանքելով դիտարկմանը, թե Հեղինե Բիշարյանը, ակնարկելով, որ որոշ ընդդիմադիր գործիչներ իշխանություններին են ծառայում, նկատի ուներ նաև Նիկոլ Փաշինյանին, պատգամավորը նշեց. «Նման փաստեր ես չունեմ, նման պիտակավորում ամրացնելու տրամադրություն էլ չունեմ: Չեմ կարող ո՛չ հաստատել, ո՛չ էլ հերքել, բայց տեսնում եմ, որ Նիկոլի պահվածքը բավականին համարձակ է ԱԺ-ում: Նա մշտապես քարկոծում է իշխանությանը: Թե դա ինչո՞վ է պայմանավորված, ես չէ, որ պետք է պատասխանեմ: Համենայն դեպս, ես տեսնում եմ, որ նա հանդես է գալիս արմատական ընդդիմության դիրքերից: Մնացածն արդեն ժամանակը ցույց կտա»: