Բաղդասարյանը հորդորում է ներողամիտ լինել Հեղինե Բիշարյանի հանդեպ

ՀՎԿ գլխավոր գրասենյակում ավարտվեց կուսակցության ղեկավար Արթուր Բաղդասարյանի ասուլիսը:

Նա անդրադարձավ իր կուսակից Հեղինե Բիշարյանի` ՀՎԿ համագումարում արած հայտարարությանը, թե սեփական մատներով կհանի ցանկացածի աչքերը, ով վատ բան կխոսի ՀՎԿ-ի և նրա առաջնորդի հասցեին:

«Մենք ոչ մի վատ բան չենք տեսնում: Կուսակցությունում էլ այդ հարցին չենք անդրադարձել: Դա ուղղված չի եղել նրանց, ովքեր մեր դեմ կխոսեն, դա ուղղված է եղել այն մարդկանց, ովքեր ասում են` կթաղեն մեզ»,- ասաց Բաղդասարյանը:

Դիտարկմանը, թե քաղաքական գործիչները, անկախ ամեն ինչից, պետք է զուսպ լինեն և օրինակ` բոլորի համար, ՀՎԿ նախագահը հորդորեց, որ ներողամիտ լինեն: «Պետք է մի քիչ էլ ներողամիտ գտնվեք, մարդ է, մի քիչ էլ ագրեսիվ է պատասխանել, դրա մեջ որևիցե բան չկա: Կողմ եմ մաքսիմալ բարեկրթությանը: Լրագրողի գործն է քննադատելը, իր տեսակետը հայտնելը, սա ես ողջունում եմ: Ուղղակի մարդ են, լեզվի սայթաքումներ են ունենում, կոնկրետ այս դեպքում, եթե խոսքը Հեղինե Բիշարյանի մասին է, նա 20 տարի է` պատգամավոր է, և չեմ կարծում, որ իր բարեկրթությամբ չի առանձնանում»,- ասաց Բաղդասարյանը: