Ապրիլյան պատերազմում լուրջ դերակատարություն է ունեցել Էրդողանը. Մարտինով

«Անդրկովկասը քաոսի և զարգացման միջև. մերձավորարևելյան անկայունության գոտուց դեպի եվրասիական ելք՝ ներդրումների ազատ միջանցք և երկաթյա վարագույր ահաբեկչության համար» խորագրով քննարկման ընթացքում Մոսկվայի Նորագույն պետությունների ինստիտուտի տնօրեն Ալեքսեյ Մարտինովը կարծիք հայտնեց, որ ապրիլի սկզբին ղարաբաղա-ադրբեջանական սահմանին կատարված դեպքերի վրա լուրջ ազդեցություն են ունեցել Թուրքիան և Էրդողանն` անձամբ:

«Ադրբեջանը վերջին 15 տարիների ընթացքում Թուրքիայի ուշադրության կենտրոնում է: Ադրբեջանի ամբողջ զինվորական էլիտան Թուրքիայով է անցել: Թուրքիայի ազդեցությունը Ադրբեջանի վրա շատ մեծ է: Ադրբեջանի ղեկավարությունն ինչ-որ իմաստով նաև տարօրինակ իրավիճակում է հայտվել: Ես ուզում եմ ասել, որ Էրդողանն անձամբ սպառնալիք է Հայաստանի համար»,- ասաց նա:

Մարտինովը չի ցանկանում Հայաստանում առկա խնդիրները տարածաշրջանային խնդիրներից առանձնացնել: «Կա Ադրբեջան, Վրաստան և Հայաստան: Ես ուզում եմ նրանց միասին դիտարկել»,- ասաց նա:

Մարտինովի խոսքով՝ Ադրբեջանում ևս կան մտածող մարդիկ, և նրանք էլ չեն ցանկանում, որ իրենց երկրում մարդիկ ծնվեն մարտնչելու ու զոհվելու համար: «Կայուն կյանքը Կովկասում նրանց էլ է հետաքրքրում, բայց Թուրքիան իրավիճակն ապակայունացնում է»,- ասաց Մարտինովը: