Սեյրան Օհանյանի անվտանգության պետի գործով պատրաստվում են լրագրողի բերման ենթարկել

Այս պահին ռազմական ոստիկանության աշխատակիցները գտնվում են «Ժողովուրդ» օրաթերթի լրագրող Քնար Մանուկյանի բնակարանում և պատրաստվում են նրան բերման ենթարկել. Yerkir.am-ի հետ զրույցում ասաց «Ժողովուրդ» օրաթերթի գլխավոր խմբագիր Թագուհի Թովմասյանը: Ըստ նրա` նման անհեթեթ, ապօրինի որոշում կայացվել է պաշտպանության նախարար Սեյրան Օհանյանի անվտանգության պետի` Սերգեյ Հայրապետովի մասնակցությամբ տեղի ունեցած միջադեպի մասին տեղեկությունները «Ժողովուրդ» օրաթերթի կողմից հրապարակվելու պատճառով: Թովմասյանն ընդգծեց, որ իրենց լրագրողը այս գործով որևէ կարգավիճակ չունի:

«Քնար Մանուկյանը չի էլ կարող որեւէ կարգավիճակով անցնել այդ գործով, քանի որ նա ընդամենը լրագրող է եւ արձանագրել է, որ Սեյրան Օհանյանի թիկնապահը մարդ է ծեծել, եւ այդ ծեծի արդյունքում գրվել է նրա համար ցանկալի ցուցմունք: Լրագրողը եղել է ընդամենը արձանագրող, քանի որ աղբյուրները շատ բաց են եւ թափանցիկ, նրանք փաստաբաններն են: Սա ինչ ապօրինություն է, սա լկտիություն է եւ իրավական դաշտի անարխիայի դրսեւորում է»,- ասաց Թագուհի Թովմասյանը: 

Նշենք, որ քիչ առաջ ՊՆ խոսնակ Արծրուն Հովհաննիսյանն էլ ֆեյսբուքյան իր էջում գրել է. «Armlur.am կայքի կողմից տարածվում են կեղծ տեղեկություններ այն մասին, որ ՀՀ ՌՈ աշխատակիցները բերման են ենթարկում իրենց աշխատակցին: Տեղեկացնենք, որ ՀՀ ՌՈ-ը նման գործառույթ իրականացնել չի կարող: Խոսքը գնում է ՀՀ Քննչական Կոմիտեի քննիչի օրենքով նախատեսված ծանուցագրի պահանջները չկատարելու մասին»: