Թուրքիայում Վանա կատուների վերահսկման հատուկ համակարգ են ստեղծել

Թուրքիայում 100-ամյակի համալսարանի՝ Վանա կատուների հետազոտության կենտրոնը դրանց վերահսկման համակարգ է ստեղծել:

Ըստ AA-ի՝ ստեղծված համակարգը թույլ կտա  ամբողջ երկրում վերահսկել Վանա կատուներին: Կատվի տերերը կարող են դիմել կենտրոն՝ ներկայացնելով համապատասխան տվյալներ, որոնց հիման վրա էլ կենտրոնն իր վերահսկողությունն է իրականացնում:

Համակարգչի միջոցով հնարավորություն է տրվում մոտիկից հետևել կատուների վիճակին, իմանալ կատվի սեռն ու հատկությունները:

AA-ի հետ զրույցում կենտրոնի տնօրեն Աբդուլլահ Քայան հայտնել է, որ նոր համակարգի աշխատանքները հաջողությամբ են ընթանում: Նրա խոսքով՝ համակարգը թույլ կտա երկրում Վանա կատուների հայտնաբերման աշխատանքներ իրականացնել:

«Այս համակարգի միջոցով կարող ենք իմանալ նրանց մասին տեղեկություններ, թե երբ, որքան ձագ ունեցան և ինչ հատկություններ ունեն»,- նշել է նա: