ՕԵԿ-ը շարունակում է հպարտանալ կուսակիցների թվով

Այսօր` խորհրդարանական ճեպազրույցների ժամանակ, ՕԵԿ խմբակցության քարտուղար Մհեր Շահգելդյանը, անդրադառնալով պետական ապարատ կրճատման, ծախսերի խնայողության` կառավարության հայտարարություններին, նշեց, որ խնդիրը մարդկանց եւ ավտոմեքենաների կրճատումը չէ, և որ ՕԵԿ-ը չի տեսնում կառավարության իրական քաղաքական կամքը: «Հայտարարություններ կան, բայց որեւէ քայլ դեռ չենք տեսնում»,- ասաց նա:

Հարցին, թե ՕԵԿ-ը միշտ խոսում է իր տասնյակհազարավոր անդամների մասին, ուստի Հայաստանի բնակչության ո՞ր տոկոսն են կազմում ՕԵԿ-ականները կամ «Հայկական վերածնունդ»- ի կուսակիցներ, պատգամավորը պատասխանեց, որ եթե իմանա՝ որքան է իրականում Հայաստանի բնակչության թիվը, հստակ կարող է պատասխանել այդ հարցին:

Մհեր Շահգելդյանի խոսքով` կուսակցությունը շարունակ համալրվում է նոր կուսակցականներով, և այս պահին կուսակցականների թիվը հասնում է 100 հազարի, նույնիսկ՝ ավելի: