Խաղաղապահների տեղակայման մասին կարելի է խոսել հիմնական համաձայնությունները ձեռք բերելուց հետո. Մինսկի խմբի ռուս համանախագահ

 «Բարձր մակարդակով ձեռք է բերվել զինված միջադեպերի հետաքննության  մեխանիզմների ուղղությամբ աշխատանքներն ավարտելու պայմանավորվածություն և այժմ ԵԱՀԿ փորձագետները զբաղված են այդ հարցով: Նախորդ շաբաթ ՄԽ գործընկերների հետ փորձագիտական մշակումները փոխանցել ենք երկու երկրների  արտաքին գործերի նախարարներին:  Սպասում ենք կողմերի եզրակացություններին»,- «Ինտերֆաքս» գործակալությանը տված հարցազրույցում այդ մասին նշել է ԵԱՀԿ Մինսկի խմբի ռուսաստանցի համանախագահ Իգոր Պոպովը

Անդրադառնալով շփման գծում խաղաղապահների տեղակայման մասին հարցին` Իգոր Պոպովը նշել է, որ դրա մասին կարելի է խոսել  այն բանից հետո, երբ կարգավորման հարցում ձեռք կբերվեն հիմնական համաձայնությունները. Նա շեշտել է, որ խաղաղապահ կոնտինգենտն ընտրվելու է հակամարտության կողմերի համաձայնության հիման վրա ընտրված երկրներից:

Պոպովը նաեւ կարեւորել է այն փաստը, որ  Վիեննայում Հայաստանի և Ադրբեջանի նախագահները  սկզբունքորեն  համաձայնել են բանակցային գործընթացի վերականգնման անհրաժեշտության հարցում: