Էրդողանին մրցանակ շնորհած հրեական կազմակերպությունը 1915-ը որակել է ցեղասպանություն

Ամերիկայում հրեական «Հակադիֆամացիոն լիգա» կազմակերպության ղեկավար Ջոնաթան Գրինբլադը ասել է, որ 1915 թվականին հայերի դեմ իրականացվածը, «անկասկած, ցեղասպանություն է եղել»` դատապարտելով դրա ժխտումը:

Ըստ «Ակօս»-ի` ԱՄՆ-ում ամենահզոր կազմակերպությունը երկար ժամանակ խուսափում էր «ցեղասպանություն» բառն օգտագործելուց, միաժամանակ` ակտիվ գործողություններ իրականացնում  ԱՄՆ Կոնգրեսում Հայոց ցեղասպանության ճանաչման դեմ` ի նպաստ Թուրքիայի:

Կայքը հիշեցնում է, որ 2005 թվականին Էրդողանը վարչապետության ժամանակ «Բացառիկ քաջություն» մրցանակ է ստացել կազմակերպության կողմից, իսկ այս տարի Էրդողանը կազակերպության ներկայացուցիչներին հյուրընկալել էր իր նստավայրում:

Կազմակերպության ղեկավարը Ցեղասպանության ճանաչման մասին մայիսի 13-ին համացանցային իր էջում հայտարարություն է տարածել, որում, մասնավորապես, ասվում է. «1915 թվականին Օսմանյան կայսրությունում հայերի դեմ կատարվածը ցեղասպանություն էր: Այս ցեղասպանությունն սկսվել է իշխանությունների կողմից հարյուրավոր հայ մտավորականների ձերբակալմամբ և սպանությամբ, որին հաջորդեցին հայ ընտանիքների տեղահանությունն ու մահվան երթերը: Հայ ազգը ենթարկվել է տեղահանության, կողոպուտի, առևանգումների, կտտանքների, սպանությունների և սովի»:

Գրինբլադն իր հայտարարության մեջ տեղեկացրել է նաև, որ այսուհետ աջակցելու է ԱՄՆ Կոնգրեսի կողմից Ցեղասպանության ճանաչման աշխատանքներին: «Լռությունն ընտրություն չէ: Պատմության մեջ տեղի ունեցած ցեղասպանությունների մասին երիտասարդներին ներկայացնելը մեր ամենամեծ պատասխանատվությունն է: 1915 թվականը, Համաշխարհային երկրորդ պատերազմն ու պատմության մյուս էջերի մասին պետք է պատմել և սովորեցնել»,- գրել է նա:

Այս մասին կարծիք է հայտնել ԱՄՆ-ում հայտնի հայ իրավաբան և հայ իրավաբանների միության նախկին անդամներից Էդվին Մինասյանը: Նա նշել է, որ կազմակերպությունն այսուհետ պետք է աջակցի Կոնգրեսի կողմից Ցեղասպանության ճանաչմանն ուղղված աշխատանքներին, այլ ոչ թե դրանց խոչընդոտ հանդիսանա: