Ուրախ եմ, որ վաղը 1915 թ. դեպքերը կանվանեն ցեղասպանություն. Բունդեսթագի պատգամավոր

Այսօր «Ընդդեմ ցեղասպանություն հանցագործության» խորագրով միջազգային համաժողովի ժամանակ Գերմանիայի Բունդեսթագի պատգամավոր Ալբերտ Վայլերը նշեց, որ մեծ պատիվ է իր համար լինել Հայաստանում ու հայերի հետ միասին հարգել  Հայոց ցեղասպանության անմեղ զոհերի հիշատակը:

«Ես շատ ուրախ եմ, որ վաղը Բունդեսթագի պատգամավորները հրավիրված նիստում 1915 թվականի դեպքերը կանվանեն ցեղասպանություն»,- ասաց պատգամավորը և անդրադարձավ Գերմանիայի կողմից արված ցեղասպանությանը: «Բոլորդ գիտեք, որ մենք` գերմանացիներս, 20-րդ  դարում մեծ մեղք ենք վերցրել մեզ վրա: Հոլոքոստը բացառիկ հանցագործություն էր ամբողջ մարդկության դեմ: Այն հավերժ և անջնջելի կերպով ամրագրված է մեր երկրի և մեր ժողովրդի պատմության մեջ»,- ասաց Ալբերտ Վայլերը: 

Նա անդրադարձ կատարեց նաև այսօր Թուրքիայում տիրող տրամադրություններին` նշելով, որ այսօրվա Թուրքիայում մարդիկ կան, ովքեր աշխատում են ապագայի ուղղությամբ՝ համատեղ եվրոպական ապագայի: «Թուրքիայում, ինչպես նախկինում, այնպես էլ այսօր կան նաև շատերը, ովքեր ավելի հաճույքով աչք են փակում և հետո հույս տածում՝ ինչը ես չեմ տեսնում, դա չկա: Սա ինչպես քաղաքականությանը, այնպես էլ քաղաքացիական հասարակությանն է վերաբերում: Ես ցանկանում եմ, որ «արհեստական կույր» մարդիկ գնալով ավելի քչանան, և որ նրանք, ովքեր տեսնել են ուզում, ովքեր վերաիմաստավորում և հեշտացում են ուզում, էլ ավելի շատանան»,- նշեց Վայլերը: