Մեկ անգամ Թալիշից տարհանվել էինք` հույս ունենալով, որ վերջին անգամ էր, բայց…

Տեղեկացրել էինք, որ այսօր ՀՅԴ անդամներն այցելեցին Եռաբլուր` Շուշիի ազատագրման համար զոհված զինծառայողների հիշատակը խնկարկելու:

Տիգրան Հայրապետյանը մեկն է այն հերոսներից, ով զոհվել է Շուշիի ազատագրման ժամանակ: Այսօր Եռաբլուր էր այցելել նաև Տիգրանի մայրը`  Հրանուշ Հայրապետյանը: Տիկին Հրանուշը մաքրում էր տղայի գերեզմանաքարը, ջրում տարածքը, խունկ վառելու համար տեղ բացում:

Yerkir.am_ի հետ զրույցում նաա պատմեց, որ տղան զոհվել է 23 տարեկան հասակում` չհասցնելով անգամ ամուսնանալ:

«Տիգրանս կամավոր մեկնեց ռազմաճակատ` Վազգեն Սարգսյանի ջոկատում որպես մահապարտ էր անդամագրվել: Ես, բնականաբար, դեմ էի, բայց ինձ ով կլսեր: Գնալուց առաջ ասաց` ես պիտի գնամ, կռվեմ, հայրենիքս պաշտպանեմ, մեր հողը պաշտպանեմ»,- պատմեց տիկին Հրանուշը:

Ի դեպ, նա նշեց նաև, որ իրենք Թալիշից են. տարիներ առաջ, երբ իրավիճակը լարված էր, եկել էին Հայաստան: Տիկին Հրանուշը 6 տղա ունի, ինքը բնակություն է հաստատել Հրազդանում, իսկ տղաները վերադարձել էին Թալիշ` ծննդավայրում ապրելու:

«Մեկ անգամ Թալիշից տարհանվել էինք` հույս ունենալով, որ վերջին անգամ էր, բայց հիմա Թալիշը նորից դատարկվեց… Չգիտեմ` վերջն ինչ է լինելու, վերջը չի երևում»,- ասաց տիկին Հրանուշը` հավելելով, որ պետությունը հիմա պետք է ձեռք մեկնի թալիշցիներին, որ ոտքի կանգնեն: