Այդ հաճույքը մենք ոչ ոքի չենք պարգևի. Լևոն Զուրաբյան

Խորհրդարանական ճեպազրույցների ժամանակ ԱԺ ՀԱԿ խմբակցության ղեկավար Լևոն Զուրաբյանը նշեց, որ ուղերձ ունի՝ ուղղված ընդդիմությանը կամ, նրա խոսքով, իրենց ֆորմալ ընդդիմություն կոչող ուժերին: Նա կոչ է անում զերծ մնալ մանր գզվռտոցներից, գործել համերաշխ ու հասնել կոնսենսուսի: Զուրաբյանը հիշեցրեց  ԱԺ երեկվա նիստը, երբ ընդդիմությունը զբաղված էր` փոխադարձ մեղադրանքներ հնչեցնելով:

«Դա անընդունելի է, մենք արդեն 70-երորդ անգամ ենք ասում, որ կա իրական ընդդիմության մեկ չափանիշ: Իրական է այն ընդդիմությունը, ով իր քննադատության թիրախ համարում է իշխանությանը, այլ ոչ այլ ընդդիմադիր ուժերի: Դուք երբևէ չեք տեսնի որ մենք զբաղվենք որևէ ընդդիմադիր կամ ձևական ընդդիմադիր որևէ քաղաքական ուժի քննադատությամբ»,- ասաց նա:

Պատգամավորը հետո հավելեց` ճիշտ է, հիմա իրենք մի քիչ ավելի զուսպ են իշխանություններին քննադատելու հարցում, որովհետև ՀԱԿ-ն այլ կերպ չէր պատկերացնում` պատերազմական վիճակում չէր կարող նախկինի պես անխնա քննադատել իշխանություններին:

«Եթե առաջ կարող էինք անխնա քննադատել իշխանություններին, ապա հիմա դա տեղափոխվել է զուսպ քննադատության ոլորտ: Բայց, միևնույն է, պատերազմական այս իրավիճակով թելադրված զսպված քննադատության թիրախը եղել է և կլինի իշխանությունը»,- ասաց նա:

Զուրաբյանը նշեց. «Եթե կարծում եք բոլշևիկների ու Լենինի նման պետք է հայտարարեինք իշխանությունների պարտության մասին պատերազմական վիճակում, ապա այդ հաճույքը մենք ոչ ոքի չենք նվիրի: Մեր դիրքորոշումը հաճույք կամ տառապանք չէ, այլ քաղաքականություն, երկրի բախտն է դրված նժարին` որպես ամենակարևոր խնդիր: Հայրենիքը վտանգի մեջ է, էդ բառը հասկանո՞ւմ եք, թե՞ չէ: Հումորի ժամանակ էլ չկա»: