Զգում եմ հպարտություն. Կարինե Մինասյանը` Պուտինի պարգևի մասին

ՀՀ նախագահի խորհրդական Կարինե Մինասյանը հպարտություն է զգում` Ռուսաստանի նախագահ Վլադիմիր Պուտինի որոշման հետ կապված:

Հիշեցնենք, որ Վլադիմիր Պուտինը հրաման է ստորագրել` պարգևատրել Կարինե Մինասյանին Բարեկամության շքանշանով: Պարգևը շնորհվել է Ռուսաստանի Դաշնության հետ բարեկամության և համագործակցության ամրապնդման, առևտրատնտեսական և մշակութային կապերի զարգացման գործում ունեցած մեծ ավանդի համար:

«Շնորհակալ եմ նման գնահատականի համար»,- ասաց Կարինե Մինասյանը yerkir.am-ի հետ զրույցում:

Նա նշեց, որ ինքն էր կառավարությունում ԵՏՄ հետ անդամակցության աշխատանքների հիմնական համակարգողը և բանակցողը, իրենից բացի, նույնատիպ աշխատանքներ էին իրականցնում նաև ՀՀ փոխարտգործնախարար Շավարշ Քոչարյանը և ՀՀ ֆինանսների նախարարի տեղակալ Սուրեն Կարայանը:

«Մենք ներկայացնում էինք Հայաստանը ԵՏՄ-ում, և մեր արած աշխատանքները տեսանելի էին դրսում, ոչ թե ներսում»,- ասաց Կարինե Մինասյանը` հավելելով, որ դեռևս պարգևատրման հրամանն է եղել, պարգևատրումը դեռ տեղի չի ունեցել, և ինքն էլ տեղյակ չէ, թե երբ տեղի կունենա: Նա համոզված է, որ ԵՏՄ-ին Հայաստանի անդամակցությունն ամենաճիշտ որոշումն էր: