Մեղավորը ոչ թե Շիրակի մարզպետարանն է, այլ` որ մենք ենք տեղում դոփում. Լոքյան

Այսօր կառավարության նիստում տարածքային կառավարման և զարգացման նախարար Դավիթ Լոքյանը ներկայացրեց մի որոշում, ըստ որի` Ախուրյանի` թվով երեք կիսաավարտ շենքերի վերջնական կառուցման համար հատկացված 798 միլիոն դրամից առաջարկվում է առանձնացնել 10 միլիոն դրամ, որը պետք է ուղղվի նախահաշիվների կազմման, արտաքին ինժեներական ցանցերի նախագծերի կազմման խնդիրների լուծմանը:

Վարչապետ Հովիկ Աբրահամյանը քաղաքաշինության նախարար Նարեկ Սարգսյանին հարցրեց աշխատանքների իրականացման ժամկետների մասին, արդյո՞ք պետք է սպասել նախագծերին, նոր սկսել շինարարությունը: «Ինչո՞ւ է այդքան ուշանում շինարարությունը»,- հարցրեց նա:

Նարեկ Սարգսյանը նշեց, որ պատվիրատուն Շիրակի մարզպետարանն է:

Դավիթ Լոքյանն էլ նշեց, որ, բնականաբար, շինարարությունն ուշանալու է: «Դրա մեղավորը ոչ թե Շիրակի մարզպետարանն է, այլ` որ մենք ենք տեղում դոփում»,- ասաց նա: 

Վարչապետը նշեց, որ ինքը Շիրակի մարզպետին չի մեղադրում, ամեն դեպքում պետք է հետևել, որ շինարարությունն արագ իրականացվի: