Թուրքիայի կառավարությունը պետականացրել է հայկական Ս. Կիրակոս եկեղեցին

Մարտի 25-ին կայացրած որոշմամբ Թուրքիայի կառավարությունը պետականացրել է հայկական Տիգրանակերտ քաղաքի Սուր թաղամասում գտնվող 6300 կառույց և տարածք, որոնց թվում է նաև Սուրբ Կիրակոս եկեղեցին: 

Ըստ «Ակօս»-ի՝ պետականացված կալվածքների թվում են նաև ասորական, քաղդեական և բողոքական եկեղեցիներ:

Սուրբ Կիրակոս եկեղեցին տարիներ շարունակ թողնված է եղել բախտի քմահաճույքին:  Այն վերջին տարիներին մեծ ջանքերի շնորհիվ վերանորոգվել և վերաբացվել էր:

«Ակօս»-ի թղթակիցը կապ է հաստատել Տիգրանակերտի քաղաքապետարանի մշակութային ժառանգության գրասենյակի նախագահ Նեւին Սոյլուքայանի հետ, ով հայտնել է,  որ Սուր շրջանում գտնվող բոլոր եկեղեցիներին և հիմնադրամներին պատկանող տարածքների պետականացման որոշումն արդեն կայացված է: Այդ կալվածքների ցանկում են քաղաքապետարանին պատկանող ունեցվածքներ, որոնց համար քաղաքապետարանը որոշել է դատի տալ կառավարությանը:

Սոյլուքայան նաև հայտնել է, որ անհրաժեշտ է, որ սեփականատերերը նույնպես դատական գործընթաց սկսեն: