Կաշառակեր ոստիկաններին աշխատանքից հեռացնելու են

Ռուսաստանի նախագահ Դմիտրի Մեդվեդեւը  Ներքին գործերի նախարար Ռաշիդ Նուրգալիեւին հանձնարարել է աշխատանքից հեռացնել այն աշխատակիցներին, ովքեր իրենց եւ իրենց ընտանիքի եկամուտների մասին սխալ հաշվետվություն են ներկայացրել:

«Այժմ դուք հրաշալի հնարավորություն ունեք բաժանվել նրանցից, ովքեր անվստահելի տեղեկություններ են ներկայացնում: Դա հեշտ կլինի անել վերալիցենզավորման միջոցով, ինչը կիրականցվի ոստիկանության մասին օրենքի համաձայն»,- ասել է Մեդվեդեւը:

Ավելի վաղ  ՌԴ Հետաքննչական հանձնաժողովի ղեկավար Ալեքսանդր Բաստիրկինը ասել էր, թե իրավապահ մարմինները կարողանում են բացահայտել կոռուպցիոն դեպքերի 40 տոկոսը միայն:

Դեռեւս նախորդ տարվա մարտին Նուրգալիեւը հայտարարել էր, թե ոստիկանների տարաբնույթ «կողմնակի եկամուտներ» ունենալը պետք է բացառել: Իսկ այսօր նա ընդգծել է, որ ոստիկանություն մտնելու են միայն վերալիցենզավորման փուլը հաղթահարած աշխատակիցները, իսկ լիցենզավորման անցկացման ձեւը որոշելու է երկրի նախագահը:

Այս մասին հաղորդում է Лента.Ру-ն: