«Հայաստան. լինելիության լեգենդներ». ցուցահանդես` Ռուսաստանի պատմության թանգարանում

Հայ-ռուսական մշակութային համագործակցության շրջանակում՝ «ՀՀ մշակույթի նախարարության և ՌԴ մշակույթի նախարարության միջև 2015 թ. համագոր­ծակցության պլանի» և «ՀՀ մշակույթի նախարարության և ՌԴ մշակույթի նա­խա­րարության միջև 2016-2018 թթ. համագործակցության մասին» ծրագրի հիման վրա` 2016 թ. մարտի 10-ին, Ռուսաստանի պատմության թանգարանում կբացվի «Հայաստան. լինելիության լեգենդներ» խորագրով քաղաքակրթական ցուցա­հանդեսը:

Կներկայացվի ավելի քան 160 ցուցանմուշ` Հայաստանի պատմության թանգարանից, Մայր Աթոռ Սբ Էջմիածնի թանգարաններից և Մ. Մաշտոցի անվան հին ձեռագրերի ինստիտուտ Մատենադարանից:

Ցուցադրության հայեցակարգին համապատասխան հրատարակվել է նաև ցուցահանդեսի պատկերագիրքը, որտեղ ներկայացված է հայ ժողովրդի պատմությունն ու մշակույթը վաղնջական ժամանակներից մինչև մեր օրերը, իսկ առանձին բաժնով` Հայոց ցեղասպանության թեման:

«Հայաստան. լինելիության լեգենդներ» խորագրով ցուցահանդեսը կբացեն ՀՀ մշակույթի նախարար Հասմիկ Պողոսյանն ու ՌԴ մշակույթի նախարար Վլադիմիր Մեդինսկին՝ երկու երկրների Նախագահների մասնակ­ցությամբ:
Ցուցահանդեսը կգործի մինչև հունիսի 13-ը: