Թուրքիայում տարեց հայ ամուսիններին թալանելու մեջ կասկածվող 8 մարդ է ձերբակալվել

Տրապիզոնում ձերբակալվել է Կ.Պոլսում տարեց հայ ամուսիններին թալանելու և այդ հարցում օգնելու մեջ կասկածվող 8 մարդ:

Ըստ Demokrathaber-ի՝ ոստիկանությունը զննել է դեպքի վայրում տեղադրված բոլոր տեսախցիկները: Բացահայտվել է տարեց ամուսինների տուն մտած հանցագործների ինքնությունը, ընդ որում` 5-ն իբր այլազգի են:

Կասկածյալներին տեղափոխել են Կ.Պոլիս՝ հարցաքննելու:

Հիշեցնենք, որ Կ.Պոլսի Շիշլի թաղամասում մի խումբ ավազակներ թալանելու նպատակով մտել էին տարեց հայ զույգի տուն, կողոպուտից հետո զույգին կապկպել էին ու հեռացել: Արդյունքում` 87-ամյա ամուսինը խեղդվել էր, իսկ 79-ամյա կինը ծանր վիճակում տեղափոխվել հիվանդանոց:

Նշենք նաև, որ դաժանաբար սպանված 87-ամյա Պետրոս Դեմիրջին Պոլսի հայտնի ոսկերիչ էր: