Չեռնոգորիան ու Հայաստանը կհամագործակցեն զբոսաշրջության ոլորտում

Այս շաբաթ կառավարության նիստի օրակարգում ընդգրկված է որոշում՝ համաձայնություն տալ «ՀՀ  կառավարության և Չեռնոգորիայի կառավարության միջև զբոսաշրջության բնագավառում համագործակցության մասին» համաձայնագրի կնքման առաջարկությանը:

Կողմերը կնքում են այդ համաձայնագիրը` երկու երկրների միջև զբոսաշրջության բնագավառում համագործակցությանը զարկ տալու համար: Կողմերը կամրապնդեն և կխթանեն զբոսաշրջության բնագավառում համագործակցությունը` երկու երկրներում գործող օրենսդրությանը և միջազգային պայմանագրերին համապատասխան, ինչպես նաև միջազգային զբոսաշրջային կազմակերպությունների շրջանակներում: Կողմերը կաջակցեն իրենց երկրներում զբոսաշրջության բնագավառում իրավասու պետական մարմինների, զբոսաշրջային օպերատորների և այլ կազմակերպությունների համագործակցությանը` երկու երկրների միջև զբոսաշրջային հոսքերի ավելացման նպատակով: Կողմերը, իրենց երկրների օրենսդրությանը համապատասխան, կձգտեն դյուրացնել երկու երկրների միջև զբոսաշրջային փոխայցելությունների ընթացակարգերը:  Կողմերը փոխադարձաբար կնպաստեն զբոսաշրջության բնագավառի վիճակագրության և այլ տեղեկատվության, ներառյալ` երկու երկրների զբոսաշրջային ռեսուրսների մասին տեղեկատվության, զբոսաշրջության ոլորտը կարգավորող իրավական ակտերի և այլ կանոնակարգերի, հետազոտությունների, ինչպես նաև գովազդային նյութերի փոխանակմանը:

Երկու երկրների միջև մշակութային զբոսաշրջության զարգացման նպատակով կողմերը կխրախուսեն երկու երկրներում մշակութային միջոցառումների, փառատոների, զբոսաշրջային միջազգային ցուցահանդեսների, տոնավաճառների, համաժողովների, սեմինարների և այլ մշակութային ու զբոսաշրջային միջոցառումների կազմակերպումը և դրանց փոխադարձ մասնակցությունը: