Հայաստանն ու Հունաստանը կհամագործակցեն ռազմատեխնիկական ոլորտում

Կառավարության այս շաբաթվա նիստում ընդգրկված է որոշում՝ համաձայնություն տալ «ՀՀ կառավարության և Հունաստանի կառավարության միջև ռազմատեխնիկական համագործակցության մասին» համաձայնագրի կնքման առաջարկությանը:

Կողմերը գործող ռեսուրսներն ավելի արդյունավետ օգտագործելու միջոցով պաշտպանական հնարավորությունների ուժեղացման նպատակով ցանկանում են հաստատել ձևական և իրավական հենք սովորական պաշտպանական տեխնոլոգիաների վերաբերյալ համագործակցության համար: Այս նպատակով ու հեռանկարում ունենալով ուժեղացնել պաշտպանական արդյունաբերության հնարավորությունները, կողմերը միջոցներ կձեռնարկեն` խթանելու համագործակցությունը հետազոտությունների և զարգացման, արտադրության, նոր տեխնոլոգիաների և ռազմական նշանակության արտադրանքի ոլորտներում:

Կողմերի միջև համագործակցությունը կներառի հետևյալ ոլորտները`

զենքի, զինամթերքի և պայթուցիկների արտադրության նպատակով տեխնոլոգիաների փոխանցում և տեխնիկական աջակցություն,

կողմերի՝ պաշտպանության ոլորտում լիազորված մարմինների գործառույթների հետ կապված հարցեր և կողմերի՝ ռազմական հետազոտություններ իրականացնող մարմինների միջև երկխոսություն,

ռազմական հետազոտությունների և գնահատման ոլորտում փորձի փոխանակման հետ կապված համագործակցություն,

զենքի արտադրության վերաբերյալ տեղեկատվության, փորձի և կարծիքների փոխանակում,

ռազմական նշանակության արտադրանքի վերաբերյալ, դրա արտադրության համար հետազոտություններ և զարգացում, ինչպես նաև երկու կողմերի աջակցությանն արժանացած` Հայաստանի Հանրապետության և Հունաստանի Հանրապետության համատեղ արդյունաբերությունների ընդլայնման նախաձեռնություններ,

ռազմական նշանակության արտադրանքի արտադրության համար համատեղ կազմակերպությունների հիմնադրում,

կողմերի փոխադարձ համաձայնությամբ` նշված ոլորտներից բացի այլ ոլորտներ: