Վերադառնալու ենք հին վառարաններին...

Այս շաբաթ կառավարության նիստում վարչապետ Հովիկ Աբրահամյանը հայտարարություն արեց գազի գների վերաբերյալ՝ ասելով, որ գազի սպառման ծավալների նվազումն ակնհայտորեն վկայում է, որ «Գազպրոմ» ընկերությունը կարող է ունենալ ավելի մեծ հասույթներ՝ ավելի ցածր գների դեպքում: Վարչապետը նաև ակնարկել է, որ Հայաստանի տնտեսության և բնակչության համար ևս գազի գինը պետք է լինի մատչելի ու շահավետ:

Ի դեպ, գազի գնի հետ կապված՝ սա առաջին ակնարկը չէ: Ավելի վաղ Հովիկ Աբրահամյանը Մոսկվայում ՌԴ վարչապետ Դմիտրի Մեդվեդևի հետ հանդիպման ժամանակ նույնպես խոսել էր գազի գնի նվազեցման անհրաժեշտության մասին, սակայն մինչ օրս ՌԴ-ից որևէ պատասխան չկա: Ականջալուր կլինե՞ն Հայաստանի կառավարության խնդրանք-առաջարկին, թե՞ ոչ:

Yerkir.am-ի հետ զրույցում խոսելով գազի գնի մասին, ԱԺ ՀՀԿ խմբակցության պատգամավոր Աշոտ Աղաբաբյանը համաձայնեց, որ ժողովուրդն ի վիճակի չէ վճարել կոմունալ ծախսերը՝ գազի ու հոսանքի վարձերը, համաձայնեց, որ գազի սպառումն իսկապես նվազել է:

«Ախր ո՞նց գազ վառեն, ո՞նց, գալու ենք էլի հին փայտե վառարաններին»,-ասաց Աշոտ Աղաբաբյանը՝ կարծիք հայտնելով, որ հարցի լուծումն այն կլինի, որ  կարևոր էներգետիկ  օբյեկտները, որոնք պետությունը վաճառել է, ստիված պետք է  լինի նորից ետ գնել: Հարցին, դա հնարավոր համարո՞ւմ է, Աշոտ Աղաբաբյանը պատասխանեց. «Ինչո՞ւ ոչ, եթե 112 միլիոն դոլար կարողանում են տալ ճանապարհներ կառուցելու համար, եթե կարողանում են վարկ վերցնել, ապա ինչու՞ ոչ»:

Հարցին, ինչպես՞ կմեկնաբանի ՀԷՑ-ի սեփականատիրոջ՝ Սամվել Կարապետյանի կողմից  նոր բարեգործական հայտարարարությունն այն մասին, որ Արցախում ծնված 4-րդ երեխայի համար պատրաստ է վճարել 5000 դոլար, ՀՀԿ-ական պատգամավորը պատասխանեց. «Բարեգործություն, բայց ու՞մ հաշվին,  հոսանքի գնի բարձրացման հաշվի՞ն»: