Սարսանգի ջրամբարի վերաբերյալ զեկույցի ընդունումը Հայաստանի համար մեկ քայլ հետ էր. Կոմանդոս

ԵԽԽՎ-ում Սարսանգի ջրամբարի հետ կապված զեկույցի ընդունումը Հայաստանի համար մեկ քայլ հետ գնալ էր նշանակում. այսօր լրագրողներին ասաց Արցախյան ազատամարտի հերոս, գեներալ-մայոր Արկադի Տեր-Թադեւոսյանը /Կոմանդոսը/:

Ըստ նրա` փորձը ցույց տվեց, որ ադրբեջանական դիվանագիտությունն իր կեղտոտ քաղաքականությունը հանգիստ առաջ է տանում:

«Ի՞նչ ստացվեց. Ադրբեջանը դեպքերը շրջեց մեզ վրա` ասելով, որ իրենք ջուր չունեն այդ տարածքում, այնինչ` իրենք էլ որոշ ջրամբարներ ունեն, որոնցից էլ մեզ ջուր բաժին չի հասնում:  Սակայն իրենց հմուտ դիվանագիտության միջոցով կարողացան արդյունքի հասնել»,- ասաց Տեր-Թադևոսյանը:

Նրա կարծիքով` հայկական կողմն է մեղավոր, որ ջրամբարի հետ կապված զեկույցն ընդունվեց: «Չգիտեմ` մեր դիվանագիտությո՞ւնն էր սխալ, թե՞ պատգամավորները, բայց մենք մեղավոր ենք և պետք է դասեր քաղենք մեր սխալներից»,- ասաց Կոմանդոսը:

Ըստ նրա` Ադրբեջանի դիվանագիտությունը, սակայն, կամաց-կամաց «նստում» է, քանի որ աշխարհը հասկանում է` ինչքան կեղծ են նրանք: