Ամենակարևոր ստեղծագործությունները ոչ մի իրադարձության հետ կապ չունեն. Քշիշտոֆ Պենդերեցկին Հայաստանում է

10 տարի առաջ այս օրը Հայաստանի պետական երիտասարդական նվագախումբն արեց իր առաջին բեմելը: Այսօր «Արամ Խաչատրյան» համերգասրահում տեղի կունենա համերգ` նվագախմբի 10-ամյակին նվիրված: Համերգին հանդես կգա նաև անվանի դիրիժոր և կոմպոզիտոր Քշիշտոֆ Պենդերեցկին:

Այսօր Պենդերեցկին լրագրողներին ասաց, որ արդեն մի քանի անգամ համագործակցել է Երիտասարդականի հետ և ամեն անգամ նկատում է, որ նվագախումբն ավելի է աճել: Նվագախումբը, ըստ նրա, Հայաստանում լավագույններից է: «Ես գուշակ չեմ, որ ասեմ` ինչ ապագա է սպասվում նրանց, բայց կուզեի` գնալով ավելի բարձունքներում տեսնել նրանց»,- նշեց Պենդերեցկին:

Նա ասաց նաև, որ իրեն հիմա երիտասարդ երաժիշտները շատ են հետաքրքրում, այդ պատճառով էլ Լեհաստանում երիտասարդ երաժիշտների կենտրոն է  հիմնել:

«Ես ողջ կյանքում գործ եմ ունեցել կայացած նվագախմբերի հետ, և հիմա եկել է մի տարիք, որ ավելի շատ ուզում եմ երիտասարդներին օգնել, նրանց կողքին լինել, նրանց ճանապարհը հարթել: Չեմ կարծում` մեծ տարբերություն կա հայ, լեհ կամ գերմանացի երիտասարդների միջև, բոլորն էլ էնտուզիազմ ունեն, որը պետք է ճիշտ «ծախսել»,- ասաց Պենդերեցկին:

Կոմպոզիտորը նշեց, որ, չնայած երիտասարդների հետ աշխատելուն, շարունակում է ստեղծագործել, այն էլ` միաժամանակ մի քանի գործերի վրա է աշխատում: Պենդերեցկին Վիեննայի օպերայի հետ համագործակցության շրջանակում օպերա է գրում, ինչպես նաև լարային քառյակի համար ստեղծագործություն: Բացի այդ` Հայաստանի «Հովեր» երգչախմբի հետ է համագործակցում, որի հետ արդեն պատրաստ ստեղծագործություն ունի:

«Ւնձ համար ոգեշնչումը տարբեր աղբյուրներից է գալիս: Ապրելով Լեհաստանում` պատերազմի, ինչպես նաև օկուպացիայի մեջ գտնվելու տարիներին ես միայն աբստրակտ գործեր էի գրում, նաև` ռեքվիեմներ: Սակայն պետք է խոստովանեմ` ամենակարևոր ստեղծագործությունները ոչ մի իրադարձության հետ կապ չունեն»,- ասաց մաեստրոն:

Նա նշեց նաև, որ մեր օրերում ամեն ինչ քաղաքականացված է, և չի կարծում, որ արվեստը կփրկի աշխարհը: «Այս կամ այն դեպքերի վրա մեր ազդեցությունը` որպես արվեստագետի, մինիմալի է հասցված: Օրինակ` Հայոց ցեղասպանության ընդունման հարցում էլ արվեստագետներն անում են, ինչ կարող են /ես էլ` իմ հերթին/, սակայն չեմ կարծում, որ արվեստագետները կարող են ինչ-որ բան փոխել»,- կարծիք հայտնեց Պենդերեցկին: