Ծաղկաձորում տեղի ունեցավ դահուկասահքի` զարգացող ֆեդերացիաների գավաթի խաղարկությունը

Երեկ Ծաղկաձորում մեկնարկեց դահուկասահքի` զարգացող ֆեդերացիաների գավաթի խաղարկությունը, որին մասնակցում են 6 երկրների ներկայացուցիչներ` Հայաստանից, Իրանից, Սերբիայից, Լիտվայից և Ռումինիայից: Մրցաշարին մասնակցում է 50 դահուկորդ:

Տղամարդկանց պայքարում` ազատ ոճում, 10 կմ տարածությունն առաջինը հաղթահարեց Հայաստանի ներկայացուցիչ Սերգեյ Միքայելյանը`  32 րոպե 41 վայրկյանում: Երկրորդ տեղում լիտվացի  Լուկաս Լակելիունասն էր, իսկ եռյակը եզրափակեց Միքայել Միքայելյանը:

Կանանց պայքարում` 5 կմ ազատ ոճում, հաղթող դարձավ Հայաստանի ներկայացուցիչ Կատյա Գալստյանը:  

Պարգևատրումից հետո հաղթող Սերգեյ Միքայելյանը զրուցեց լրագրողների հետ:

«Նման խոշոր մրցաշար առաջին անգամ է անցկացվում մեր երկրում: Շատ կարևոր է նման մրցաշարում լավ արդյունք ցույց տալը,  հատկապես, որ ինձ հետ մրցում էին 2 ուժեղ դահուկորդներ: Հիմա փոքր վնասվածք ունեմ մեջքիս հատվածում և չեմ կարող ասել, թե առաջիկայում ինչ մրցաշարերի կմասնակցեմ»,- ասաց նա:

Այսօր` հունվարի 21-ին, կկայանան  դահուկասահքի դասական մրցաձևերը: