Ռուսական ուղղաթիռները և կործանիչները հնարավոր է տեղակայվեն Գյումրիի ռուսական ռազմաբազայում. ՀՀԿ-ական

Ռուս Ուղղափառ եկեղեցու պատրիարք Կիրիլի հայտարարությունը, թե Օսմանյան Թուրքիայում քրիստոնյաներին չեն ոչնչացրել, բավական սուր արձագանք է գտել Հայաստանի հասարակության շրջանում:

ՀՀԿ խմբակցության պատգամավոր Մկրտիչ Մինասյանն այսօր լրագրողներին ասաց, որ այս հայտարարությունը պատահականության արդյունք էր, գուցե` նաև քարտուղարի վրիպումը:

«Այս ֆոնին, երբ ՌԴ-ն այս կողմերում ավելի խոշոր դաշնակից չունի, քան մենք ենք: ՌԴ Դուման ընդունել է Հայոց ցեղասպանությունը, և հանկարծ Կիրիլը պետք է նման հայտարարություն անի՞: Ես կարծում եմ` սա թյուրիմացություն է, և պետք է հայտարարությամբ հանդես գա»,- ասաց Մինասյանը:

Անդրադառնալով հայկական բանակի՝ ռուսական ուղղաթիռներով և կործանիչներով համալրվելու թեմային՝ ՀՀԿ-ական պատգամավորը չբացառեց, որ, հաշվի առնելով ռուս-թուրքական շարունակական լարված հարաբերությունները, հնարավոր է՝ դրանք տեղակայվեն նաև Գյումրիի ռուսական ռազմաբազայում:

Մինասյանը խոսեց նաև Ավետիսյանների ընտանիքի դեպքի և Պերմյակովի դատավորության մասին: Նա նշեց`զարմանալի չէ, որ Ավետիսյանների սպանության գործով դատական առաջին նիստն անցկացվել է ռուսական ռազմաբազայում: «Ինչ վերաբերում է Պերմյակովի պատժին, ապա այդ կենդանուն պետք է ամենախիստ պատիժը տալ: Եթե օրենքով բացառություն արվի, ճիշտ կլինի բարձրագույն պատիժ՝ մահապատիժ կիրառել»,- եզրափակեց պատգամավորը: