ՆԱՏՕ ԽՎ գլխավոր քարտուղարը տեղյակ չի եղել, որ թուրքական ռազմական ուղղաթիռները հատել են ՀՀ օդային սահմանը

ՆԱՏՕ-ի Խորհրդարանական վեհաժողովում ՀՀ ԱԺ պատվիրակության անդամ Թևան Պողոսյանն այսօր` լրագրողների հետ հանդիպման ժամանակ, խոսելով հոկտեմբերի 6-ին և 7-ին Հայաստանի օդային սահմանը հատած Թուրքիայի ռազմական ուղղաթիռների մասին, պատմեց, թե ինչպես է դրա մասին հարց ուղղել ՆԱՏՕ-ի գլխավոր քարտուղար Իենս Սթոլթենբերգին:

Քանի որ հարցը չի կարողացել ուղղել նիստի ժամանակ, դա արել է միջանցքում: «Վազելով` բռնեցրի միջանցքում, որպեսզի հարցս ուղղեմ: Նա զարմացավ` ասելով, որ տեղյակ չէ, և խնդրեց գրավոր տեղեկացնել»,- ասաց Թևան Պողոսյանը:

«Եթե մի կառույց իսկապես գնահատում է իր անդամ երկրների անվտանգությունը, ապա պետք է ինքը սկսի հետևել հենց նրանց գործունեությանը  և անձամբ ներողություն խնդրի, եթե թուրքական ուղղաթիռների կողմից Հայաստանի օդային սահմանը խախտելը եղանակային պատճառներով է եղել»,-ասաց պատգամավորը` հավելելով, որ  Հայաստանը տարածաշրջանում ՆԱՏՕ-ի լավագույն գործընկերն է:

Հայաստանի պատվիրակության մեկ այլ անդամ` Կորյուն Նահապետյանը, հավելեց, որ թուրքական կողմը պարզաբանել է, թե ՀՀ օդային սահմանը հատվել էր վատ եղանակային պայմանների, մառախուղի պատճառով: