ՏԿԱԻՆ-ի պաշտոնյան խորհուրդ է տալիս Ամանորին կասկածելի պայթուցիկներ չգնել

Ամանորին ընդառաջ` ՏԿԱԻՆ պետական և տեխնիկական անվտանգության տեսչության քարոզչության բաժնի պետ Սերգեյ Հայրապետյանը լրագրողների հետ հանդիպման ընթացքում խորհուրդ տվեց պահպանել հրդեհային անվտանգության կանոնները, մասնավորապես` հրավառությունների ժամանակ:

«Հաճախ ականատես ենք լինում, որ տարբեր հրավառություններից հրդեհներ են առաջանում, որոնք նաև մարդկային կորուստների պատճառ են դառնում»,- ասաց նա՝ նշելով, որ, բարեբախտաբար, մեր հանրապետությունը վերջին 20 տարում մահվան հանգեցրած հրավառություններ չեն եղել:

ՏԿԱԻՆ պաշտոնյայի խոսքով՝ միայն այս տարի հրավառությունների և պայթուցիկների գործադրման արդյունքում 5-6 մարդ է տուժել, բարեբախտաբար` ոչ ծանր հետևանքներով:

Նա խորհուրդ տվեց զերծ մնալ կասկածելի ծագում ունեցող պայթուցիկներ ձեռք բերելուց և օգտագործել միայն լիցենզավորված ճայթուցիկներ: Սերգեյ Հայրապետյանի խոսքով՝ պայթուցիկների վրա պարտադիր հայերեն նշագրում պետք է լինի, հասկանալի ձևով գրված լինեն օգտագործման կանոնները: