ԱՄՆ-ն իր գործընկերներին զգուշացրել է Ռուսաստանից և Չինաստանից զենք չգնել

Ռուսաստանից և Չինաստանից զենքի գնումը կարող է հանգեցնել օտարերկրյա պետությունների նկատմամբ ԱՄՆ պատժամիջոցների կիրառմանը: Այս մասին հայտարարել է ԱՄՆ պետքարտուղարի քաղաքական-ռազմական հարցերով օգնական Քլարկ Քուփերը` հեռախոսային ճեպազրույցի ընթացքում պատասխանելով հարցին, թե արդյո՞ք Իրաքը կարող է ձեռք բերել ռուսական հակաօդային պաշտպանության համակարգեր:

«Սա շատ տեղին հարց է, երբ դիտարկում ենք զենքի առևտրի պարամետրերն ամբողջ աշխարհում,- ասել է Քուփերը:- Կա CAATSA (Պատժամիջոցների միջոցով հակահարված  Ամերիկայի հակառակորդներին), և, իհարկե, այն կարող է կիրառվել»։

Պետքարտուղարի օգնականը հիշեցրել է, որ ռուսական և չինական համակարգերը, պլատֆորմները կամ տեխնոլոգիաները չեն կարող համագործակցել ամերիկյան համակարգերի հետ և չեն բավարարում անվտանգության ոլորտում Միացյալ Նահանգների գործընկեր երկրների փոխգործակցության պայմաններին:

«Այնպես որ՝ գործնական տեսանկյունից, դա, իհարկե, օգուտ չի բերի որևէ գործընկերոջ՝ լինի Իրաքը, թե՝ ցանկացած այլ երկիր: Բացի այդ՝ ավելի վաղ նշեցի՝ կան օրենքներ, որոնք կարող են նախատեսել պատժամիջոցների կիրառման հնարավորություն»,- ասել է Քուփերը: