Կրակոցները բանակցությունների մեկ այլ ձև են. Թևան Պողոսյան

Այսօր լրագրողների հետ զրույցում «Ժառանգություն» խմբակցության պատգամավոր Թևան Պողոսյանն անդրադարձավ սահմանային լարվածությանն ու Սարգսյան-Ալիև հանդիպմանը: Նա համոզված է որ ցանկացած հանդիպում կազմակերպվում է նրա համար, որ կողմերը խոսեն իրար հետ:

«Մի բան պետք է հասկանաք, որ եթե բանակցում են սեղանի շուրջ, չեն բանակցում առաջին գծում, եթե չեն բանակցում սեղանի շուրջ, բանակցությունները տեղափոխվում են առաջին գիծ: Այդ նույն կրակոցները բանակցությունների մի այլ ձև են»,- ասաց Թևան Պողոսյանը:

Ինչ վերաբերում է Սարգսյան-Ալիև հանդիպմանը, պատգամավորը կարծում է, որ որքան շատ լինեն հանդիպումները, այնքան շատ կլինեն դրական տեղաշարժերը: Հանդիպումն էլ անպտուղ էր, որովհետև թեթև հույսեր հայտնելու հայտարարություններ էին:

Պատգամավորը նշեց, որ ՀՀ ԱԳ նախարար Էդվարդ Նալբանդյանը հանդիպումից հետո տված հարցազրույցում «բավական անհուսալի» էր գնահատել ադրբեջանական կողմի քաղաքականության փոփոխությունը: Պողոսյանն ասաց, որ քանի որ Ադրբեջանը չի փոխելու իր մարտավարությունը՝ սահմանը լարված պահելու առումով, Հայաստանը պետք է հզորացնի բանակն ու դրանով իսկ հասկացնի Ադրբեջանին, որ ռազմական քայլերով խնդիր լուծել չեն կարող:

«Մինսկի խումբը պետք է հասկանա, որ սրանից հետո այլևս ժամանակ չկա փափուկ կեցվածքի, որ երկու կողմերի, երեք կողմերի միջև հավասարության նշան պահելն այլևս անընդունելի է»,- շեշտեց պատգամավորը: