Թուրքիայում բացվում է Օսմանյան ձեռագրերի հետազոտության մագիստրատուրայի ծրագիր

Թուրքիայի Ստամբուլի քաղաքակակրթության համալսարանում (İMU) բացվում է օսմանյան ձեռագրերի հետազոտության մագիստրոսական ծրագիր, որին մասնակցելու են  արտերկրյա ուսանողներ:  Ermenihaber-ը, վկայակոչելով թուրքական «Karar» լրատվական կայքը, հայտնում է, որ մագիստրատուրայի դասընթացների տևողությունը լինելու է 3 տարի:

Ծրագրի  իրականացումը տեղի է ունենում Թուրքիայի դրամաշնորհների աջակցությամբ: Ուսանողների ընդունելությունը սկսվելու է 2016-2017թթ:

İMU համալսարանի  գրականության ֆակուլտետի պատմության բաժնի դասախոս, դոկտոր Սելիմ Քարահասանօղլուն նշել է, որ  ծրագրին մասնակցելու են այն երկրների ուսանողները, որոնց երկրները ժամանակին գտնվել են Օսմանյան կայսրության կազմում:

Նշվում է, որ այն օտարերկյա ուսանողները որոնք թուրքերենի չեն տիրապետում, 1 տարի կմասնակցեն թուրքերեն լեզվի դասընթացների, ապա նոր կզբաղվեն օսմանյան ձեռագրերով և այլ հետազոտություններով: Ուսանողները ծրագրի ավարտից հետո կարող են շարունակել ուսումը նույն համալսարանում՝ գրելով թեկնածուական աշխատանք:

Բացի դրանից` ուսանողներն իրենց աշխատանքները գրելու ընթացքում կարողանալու են օգտվել օսմանյան որոշ արխիվներից: Ծրագրին մասնակցելու են Հայաստանից, Վրաստանից, Ադրբեջանից, Հորդանանից, Հունաստանից, Իսրայելից, Իրանից, Իրաքից, Եգիպտոսից, Սիրիայից և մի շարք այլ երկրներից ուսանողներ: Ընդունելություն է կատարվելու նաև  Ռուսաստանի Դաշնությունից: