Որևէ մի տեղ նման բուժապահովում չկա, ինչպես բանակում. Մովսես Հակոբյան

ՀՀ ԶՈՒ գլխավոր շտաբի պետի տեղեկալ Մովսես Հակոբյանը ԱԺ Պաշտպանության, ազգային անվտանգության և ներքին գործերի մշտական հանձնաժողովում «Նախազորակոչային պատրաստության և զորակոչի կազմակերպման խնդիրները» թեման քննարկելիս հայտարարել էր, որ ինչպես միշտ, այս տարի էլ զորակոչի կազմակերպման ընթացքն իրենց ուշադրության կենտրոնում է, այդ թվում` զորակոչիկների բժշկական ստուգման աշխատանքները:

Լրագրողների դիտարկմանը, որ առ այսօր բանակ են զորակոչվում առողջական լուրջ խնդրներ ունեցող երիտասարդներ, Մովսես Հակոբյանը պատասխանեց. «Սխալվելը բոլոր դեպքերում բացառված չէ: Այդ պարագայում կրկնակի բուժզննում է տարվում, եթե անհրաժեշտ է` բուժում են, եթե պիտանի չէ՝ զորացրում են բանակից»:

Անդրադառնալով, այն հանգամանքին, որ շատ երիտասարդներ հենց զինվորական ծառայության ժամանակ են հիվանդություններ ձեռք բերում, ասաց, թե ինչպես հասարակության մեջ, այնպես էլ բանակում մարդիկ հիվանդանում են: Հակոբյանը վստահեցրեց, որ բանակում բուժօգնությունն ավելի պատշաճ է իրականացվում, քան այլ բուժհաստատություններում:

«Միանշանակ կարող եմ վստահեցնել, որ բուժսպասարկման վիճակը բանակում բավական բարձր մակարդակի վրա է: Հասարակության որևէ մի տեղ նման բուժապահովում չկա, ինչպես բանակում: Մարդիկ կարող են հիվանդանալ: 10 կամ 15 տարվա հետ համեմատեք, տեսեք, որ նվազել է: Այնպիսի վիճակ է, որ հիվանդությունների պատճառով կորուստներ չունենք, բայց եթե զինվորը հիվանդանում է, բուժում ենք, նոր զորացրում բանակից»,- եզրափակեց ՀՀ ԶՈՒ գլխավոր շտաբի պետի տեղակալը: