Հայերի նման ունեմ բարոյական սկզբունքներ, ֆրանսիացիների նման սիրում եմ շատախոսել, ռուսների նման՝ ուրախանալ. Ազնավուր

Հայազգի հանրահայտ շանսոնյե Շառլ Ազնավուրը հոկտեմբերի 3-ին համերգ կտա Մոսկվայում: Համերգին ընդառաջ` Ազնավուրը հարցազրույց է տվել  ИТАР-ТАСС գործակալությանը:

«Ես անհամբերությամբ  սպասում եմ ռուս հանդիսատեսի հետ հանդիպմանը: Ռուսաստանը, Հայաստանի, Իտալիայի և Իսպանիայի հետ, այն երկրներից է, որտեղ ինձ միշտ  հատկապես հաճելի է գտնվել»,- նշել է Ազնավուրը:

«Երբեք չեմ մոռանա իմ առաջին համերգները ԽՍՀՄ-ում 1963-ին: Նախատեսված 30 երգի փոխարեն ես երգեցի մոտ 60 երգ»,- պատմում է շանսոնյեն:

«Այս անգամ ևս  կկատարեմ իմ դասական երգացանկը՝ չանդրադառնալով նոր երգերիս: Միաժամանակ,  չեմ մոռանում ռուսերենով սկավառակ թողարկելու պլանների մասին: Ես արդեն ունեմ ռուսերեն տեքստեր, բայց դեռ ոչ ոք չի թարգմանել դրանք, իսկ ես ցանկանում  եմ իմանալ դրանց բովանդակությունը` նախքան ձայնագրելը»,- պատմում է Ազնավուրը՝ նշելով, որ ռուսերեն որոշ բառեր գիտի, բայց չի կարողանում ազատ խոսել:

«Ինչպես գիտեք՝ իմ նախնիները սերտորեն կապված էին Ռուսաստանի հետ: Իմ հորական պապը Նիկոլայ Երկրորդի ժամանակաշրջանում Թիֆլիսի նահանգապետի խոհարարն էր: Հասնելով Ֆրանսիա՝  և' պապս, և' հայրս Փարիզի Լատինական թաղամասում ռեստորաններ են բացել ռուսական եւ կովկասյան խոհանոցով: Ես մինչ օրս շատ եմ սիրում ռուսական խոհանոցը, մասնավորոպես` կոտլետներ ու բորշչ»,- ասել է նա:

Հարցին՝  ի՞նչ բնավորություն է իրեն բաժին հասել տարբեր էթնիկ համայքներից՝ ֆրանսիական, հայկական, թե ռուսական, Ազնավուրը պատասխանել է. «Կարծում եմ՝ դա այդ ազգերի տարբեր տարրերի խառնուրդ է: Հայերի նման ես շատ բարոյական սկզբունքներ, պարկեշտության նորմեր պահպանող մարդ եմ: Ֆրանսիացիների նման ես սիրում եմ շատախոսել, ռուսների նման՝ ուրախանալ: Այդ խառնուրդն ինձ ամբողջությամբ հերիքում է կյանքի համար»,- ընդգծել է երգիչը:

Ազնավուրը նշել է, որ թերթերը գրում են, թե գիշերը երգեր է գրում, սակայն դա այսպես չէ: «Լավ առողջություն ունենալու համար գիշերը պետք է քնել: Տեքստեր եմ գրում ամեն օր՝ աշխատելով առավոտից մինչև կեսօր: Ընդհանուր առմամբ, գրել եմ մոտ 1000 ստեղծագործություն»,- նշել է նա:

Ազատ ժամանակ Ազնավուրը սիրում է ֆիլմեր դիտել, այդ թվում՝  խորհրդային, և գիրք կարդալ: 

Զրույցի վերջում Ազնավուրը շնորհավորել է լրագրողին ИТАР-ТАСС-ի 110-ամյակի կապակցությամբ և հույս հայտնել, որ ինքը ապագայում ևս նման հոբելյան կնշի: