«Հարցը ոչ միայն աղջկաս մահն է, այլ նաև այն երեխաների ճակատագիրը, որոնք այդ բժշկի ձեռքի տակով են անցնում»

Հունիսի 16-ի ցերեկը Արմավիրի բժշկական կենտրոնի ինֆեկցիոն բաժանմունք էր ընդունվել Ջրաշեն գյուղի 4-ամյա բնակիչ Կարինե Հովհաննիսյանը` ջերմություն, թուլություն, փսխում, լուծ ախտանշաններով։ Առողջապահության նախարարության տեղեկացմամբ` երեխայի վիճակը գնահատվել է միջին ծանրության` «սուր աղիքային ինֆեկցիա» նախնական ախտորոշմամբ: Սակայն ժամեր անց երեխան մահացել է: 

Երեխայի ծնողները երեխայի մահվան մեջ մեղադրում են Արմավիրի բուժկենտրոնի ինֆեկցիոն բաժանմունքի վարիչ Անահիտ Պետրոսյանին: Բժիշկն իրեն մեղավոր չի համարում, ըստ նրա` երեխայի մահվան պատճառը նրան ուշ հիվանդանոց տեղափոխելն է:

Բժշկական կենտրոնում 4-ամյա աղջնակի մահվան դեպքի առթիվ հարուցված քրեական գործի շրջանակներում հոկտեմբերի 20-ին մեղադրանք է առաջադրվել հիվանդանոցի ինֆեկցիոն բաժանմունքի վարիչ Անահիտ Պետրոսյանին: Նրա նկատմամբ խափանման միջոց է ընտրվել չհեռանալու մասին ստորագրությունը: Օրերս էլ Պետրոսյանն ազատվեց բաժնի վարիչի պաշտոնից` քրեական գործի շրջանակներում:

Yerkir.am-ի հետ զրույցում աղջկա հայրը` Հակոբ Հովհաննիսյանը, նշեց, որ հիմա իրենք անհամբեր դատի օրը նշանակելուն են սպասում:

«Մի անգամ տեսանք բժշկին` ոստիկանությունում: Չգիտեմ: Նա մինչև վերջ իրենն է պնդում, բայց նրա մեղքն ապացուցվել է, սպասում ենք դատին: Ես ցանկություն էլ չունեմ ինչ-որ կերպ շփվել հետը, եթե ինքն էլ ուզենա: Ցանկություն չունեմ, առհասարակ, նրան տեսնելու: Հիմա փաստաբաններս նրա գործով են զբաղվում, փաստերն են քննում»,- ասաց Հովհաննիսյանը:

Ըստ նրա` ամենևին էլ կապ չունի այն հանգամանքը, որ բժիշկը մինչ օրս չի ընդունում իր մեղքը, իրենք պայքարելու են մինչև վերջ: Հովհաննիսյանն ասում է, որ բժշկուհին պետք է կրի իրեն հասանելիք պատիժն իր աղջկա մահվան համար:

«Ես մինչև վերջ գնալու եմ, կապ չունի` դատը կշահե՞մ, թե՞ ոչ, նա փո՞ղ կտա դատավորին, թե՞ չէ: Այստեղ դատը չշահեցինք, ուրիշ տեղ կդիմենք… Նա մինչև վերջ իր պատիժը ստանալու է, և ես սա անում եմ ոչ միայն իմ աղջկա համար, այլ նաև այն երեխաների, որոնք անցնում են այս բժշկի ձեռքի տակով: Մարդու մեջ եղած հավատն իրենք իրենց ձեռքով են քամում»,- ասաց նա: 

Քրեական գործի զարգացումները կներկայացնենք ավելի ուշ: