Արամ Մանուկյանն առաջարկում է միայն Սյունիքի մարզի համայնքները խոշորացնել

ՀԱԿ պատգամավոր Արամ Մանուկյանը շարունակում է դեմ լինել համայնքների խոշորացման գործընթացին: Իր այս դիրքորոշումը նա մեկ անգամ ևս այսօր ներկայացրեց  ԱԺ արտահերթ նիստում:

«Դեմ լինելու իմ փաստարկը հետևյալն է՝ չի կարելի խոշորացման գնալ այն պարագայում, երբ Հայաստանում մարդ չի մնացել, երբ շատ գյուղերում առաջին դասարաններ չկան, երբ ֆինանսական միջոցներ չկան: Բացի այդ՝ կան համայնքներ, որոնք երկու-երեք հազար բնակչություն ունեն, մինչդեռ՝ իշխանությունները ցանկանում են դրանք միացնել առանց այն էլ մեծ մեկ այլ համայնքի՝ Դիլիջանին»,- հայտարարեց պատգամավորը:

Պատգամավորն իշխանություններին հորդորեց զերծ մնալ համայնքների խոշորացման ծրագրից, սակայն նշեց, որ գաղափարը կարելի է փորձարկել միայն Սյունիքի մարզում:

Սրան ի պատասխան, ՀՀԿ խմբակցության պատգամավոր Խոսրով Հարությունյանը նշեց, որ համայնքների խոշորացման հարցը քննարկման ենթակա չէ, «այն աներկբա» է: «Խոշորացմամբ մենք համայնքների զարգացման լուրջ հնարավորություններ ենք ստեղծում, այս ծրագիրը միանգամայն արդարացված է»,- համոզմունք հայտնեց պատգամավորը` հիշեցնելով, որ համայնքային խոշորոցման գործընթաց չանցած միակ երկիրը շարունակում է մնալ Ֆրանսիան: