Սահմանադրական փոփոխություններ են երկրում ընթանում, մենք երեք համայնք ուզում ենք խոշորացնել, իմա՞ստը. Արմեն Ռուստամյան

Այսօր խորհրդարանական արտահերթ նիստում ելույթ ունեցավ ՀՅԴ խմբակցության ղեկավար Արմեն Ռուստամյանը: Նա անդրադարձավ «Վարչատարածքային բաժանման մասին» օրենքի նախագծին, որով նախատեսվում է համայնքների խոշորացում կատարել ՀՀ երեք մարզերում: Ներկայացնելով ՀՅԴ խմբակցության տեսակետը՝ նա հայտարարեց. «Ես ուղղակի չեմ հասկանում, թե ինչո՞ւ քաղաքական այսքան կարևորագույն գործընթացներից այսքան կտրված, ժամանակից դուրս ինչ-որ նախագիծ է ներկայացվում: Ակնհայտ է, որ սահմանադրական փոփոխությունները նոր լուծումներ են առաջարկում բոլոր այն հարցերի հետ կապված, որ այստեղ բարձրացվում են: Մենք ունենալու են շատ անհասկանալի վիճակ՝ տարբեր կատեգորիաներում հայտնված համայնքներ»:

Ռուստամյանի խոսքով` սահմանադրական փոփոխություններից հետո մարզերում դարձյալ առաջանալու են այսպիսի խնդիրներ, բայց նոր Սահմանադրությունն այդ հարցին տալիս է ավելի լավ, ավելի նոր լուծումներ: «Մենք ինչո՞ւ ենք ուզում այս փոփոխությունն այսքան արագ իրականացնել: Այստեղ ներկայացվում է, որ հաշվի են առնվել հանրաքվեի արդյունքները: Հանրաքվեի արդյունքներն ընդհանրապես հաշվի առնված չեն, ավելին` 110 հոդվածի կոպիտ խախտմամբ է եղել: Սահմանադրության այս հոդվածն ասում է, որ պետք է կցված լինեն նաև հանրաքվեների արդյունքները, սակայն հանրաքվեի արդյունքներն այս փաստաթղթին կցված չեն: Իսկ ինչի՞ հիման վրա են ասվում, որ արդյունքները դրական են: Ո\'չ: Տեղական հանրաքվեի մասին 35-րդ հոդվածն ասում է, որ տեղական հանրաքվեի դրված հարցը կամ օրենքի նախագիծը համարվում է ընդունված, եթե կողմ է քվեարկել քվեարկողների կեսից ավելին, բայց՝ ոչ պակաս, քան ցուցակներում ընդգրկված անձանց մեկ երրորդը: Հանե՞լ եք մեկ երրորդը: Մենք հանել ենք և ստացվել է հետևյալ պատկերը, որ Լոռու մարզում միայն Թումանյանն է ութ համայնքից, որն ապահովում է մեկ երրորդի պահանջը: Դուք վերցրել եք, ավտոմատ նայել եք, որ մեծամասնությունը կողմ է : Ո\'չ, պետք է նաև կողքի մասում գրեիք, որ ընդհանուր ցանկի մեկ երրորդն է»,- ասաց  պատգամավորը:

«Միայն Սյունիքում է անցել, էն էլ երկու համայնքում զրո է: Բայց մենք ունենք որոշակի կասկածներ, որ համայնքից գոնե մեկը կարող էր դեմ լիներ: Այս նախագիծն ուղեկցվում է Սահմանադրության կոպիտ խախտմամբ: Սահմանադրական փոփոխություններից հետո մենք բոլորովին նոր հիմքեր ենք ստեղծել թե\' տարածքային բաժանման, թե\' ՏԻՄ ընտրություններն իրականացնելու առումով»,- նշեց Ռուստամյանը:

Նրա խոսքով` կարելի է Երևանի մոդելը տարածել նաև մարզերում՝ շրջանային կառավարում լինի, ավագանի ձևավորվի, ավագանին իր միջից ընտրի համայնքապետ, այնուհետև` վարչական տարածքների ղեկավարներ նշանակվեն: «Եթե այս տրամաբանությամբ հարցին մոտենանք, անիմաստ է դառնում այս կցկտուր, թքած-կպցրած լուծումը, էն էլ, որ վերաբերում է միայն երեք մարզի: Նոր Սահմանադրության 189 հոդվածն ասում է, որ օրենքով կարող են ստեղծվել միջհամայնքային միավորներ, որոնք ունենալու են ՏԻՄ լիազորություններ: Առջևում ունենք շատ լուրջ, արմատական փոփոխություններ իրականացնելու, հայեցակարգված լուծում տալու հնարավորություն, բայց ոնց որ ոչ մի բան տեղի չի ունենում: Սահմանադրական փոփոխություններ են երկրում ընթանում, մենք բերել ենք՝ երեք համայնք ուզում ենք խոշորացնել, իմա՞ստը»,- հայտարարեց Ռուստամյանը:

Նա նշեց նաև, որ ՀՅԴ խմբակցությունը դեմ է լինելու այս մոտեցմանը, որովհետև ավելի ամբողջական է պատկերացնում հարցի լուծումը և առաջարկում է հետ տանել օրինագիծն ու շտկումներ անել: