Տուլայի դեպքը կարող են կրկնվել, քանի դեռ մեր երկրում օրենքները չեն գործում

Տուլայի դեպքը կարող է կրկնվել, քանի դեռ մեր երկրում փոխադրում իրականացնելու համար անհրաժեշտ է միայն լիցենզիա և շարժակազմ, քանի դեռ օրենքները չեն գործում. այսօր լրագրողներին ասաց Փոխարտադրողների միության նախագահ Հրանտ Եղիազարյանը: Ըստ նրա` մենք սկսում ենք անհանգստանալ տրանսպորտի ոլորտի խնդիրների մասին, երբ լուրջ խնդիր է լինում, և որոշ ժամանակ անց դարձյալ մոռանում ենք ամեն ինչ:

«Ասում են` վարորդի աչքը կպել է: Հնարավոր է. վարորդը մաշվում է, պետք է որոշ ժամերի քանակով աշխատի, այսինքն` շաբաթական 41 ժամ, իսկ մեզ մոտ աշխատում են ինչքան ի վիճակի են: Դրա համար էլ վարորդների որակն ընկել է»,- ասաց Եղիազարյանը:

«Անհատ վարորդների պաշտպանություն» ՀԿ-ի նախագահ Մխիթար Օհանյանն էլ նշեց, որ իրենք 1000 ստորագրություն են հավաքել, որով անվստահություն են հայտնում տրանսպորտի և կապի նախարար Գագիկ Բեգլարյանին: Ստորագրությունները վաղը կհանձնեն նախագահին:

«Այդ նախարարությունում ոչ ոք գործից չի հասկանում, բոլորն իրենց մորքուրի երեխեքին են ընդունել աշխատանքի: Մենք նախագահից կպահանջենք, որ տրանսպորտի ոլորտը կարգավորի ՃՈ-ն, թե չէ ոլորտն անվերահսկելի է դարձել»,- ասաց Օհանյանը: