Թուրքիայում վերանորոգում են Պալյանների գերեզմանատունը

Թուրքիայում վերանորոգում են հայտնի ճարտարապետներ տված Պալյան ընտանիքի գերեզմանատունը:

«Ակօս»-ը տեղեկացնում է, որ վերանորոգման աշխատանքների շրջանակում կկառուցվի նաև Պալյանների հիշատակին նվիրված հուշարձան:

Ուսքուդարի Սուրբ Խաչ գերեզմանատան տարածքում գտնվող ընտանեկան գերեզմանատունը կվերանորոգվի Թուրքիայում գործող Հայ ճարտարապետների և ինժեներների միության և Անուշավան Հրաչ Քըրմըզըյանի աջակցությամբ:

Անցյալ ամիս Քարթալի քաղաքապետարանին պատկանող շինարարական տարածքում հայտնաբերված` Կարապետ Պալյանի գերեզմանի համար ևս կկառուցվի հուշարձան-գերեզմանաքար, որը նույնպես կկցվի վերանորոգված գերեզմանատանը:

Վերանորոգման աշխատանքները սկսվել են սեպտեմբերի 18-ին: Արարողությանը մասնակցել են ճարտարապետներ Ժան Գավրիլոֆը, Նազար Բինալթւն և Դավիթ Այնալըն:

Նախատեսվում է, որ գերեզմանատան վերանորոգման աշխատանքները կավարտվեն 2016 թվականի մայիսին:

Անուշավան Հրաչ Քըրմըզըյանը «Ակօս»-ի հետ զրույցում ասել է, որ Սուրբ Խաչ գերեզմանատուն այցելության ժամանակ տեսել է Պալյանների գերեզմանատան անխնամ վիճակը և որոշել ստանձնել վերանորոգման աշխատանքները: Նա դա իր պարտքն է համարում Պալյանների հանդեպ, նաև` այդ բարեգործության միջոցով ցանկանում է օրինակ ծառայել մարդկությանը:

Քըրմըզըյանը հայտնել է նաև, որ ցանկանում է քարտեզ ստեղծել, որում կտեղանշվեն Պալյանների կառուցած ճարտարապետական կառույցները: