Սեյրան Սարոյանի որդու մասնակցությամբ միջադեպի վայրում պարկուճ է հայտնաբերվել

Արդեն հայտնել ենք, որ ՀՀ ԱԺ պատգամավոր Սեյրան Սարոյանի որդու մասնակցությամբ միջադեպ է տեղի ունեցել Ծաղկաձորում: Թեև որոշ լրատվամիջոցներ ամեն կերպ փորձում են հերքել տեղի ունեցածը, փոխարենը` իրավապահները հաստատում են:

Yerkir.am-ին ոստիկանությունից հայտնեցին, որ դեպքը տեղի է ունեցել օգոստոսի 29-ին: Օգոստոսի 30-ին ոստիկանությունում հաղորդում են տվել այն մասին, որ գիշերը՝ ժամը 3-ի սահմաններում, «Հացատուն» ռեստորանային համալիրում հնչել են կրակոցներ: Դեպքի վայր մեկնած օպերատիվ խումբը դեպքի վայրում հայտնաբերել է պարկուճ և փամփուշտներ: Նույն օրը դեպքի առթիվ նախապատրաստված նյութերը փոխանցվել են ՀՀ քննչական կոմիտեին:

Քննչական կոմիտեից էլ Yerkir.am-ի հետ զրույցում հաստատեցին, որ նման ահազանք է ստացվել, և որ դեպքի հանգամանքները պարզվում են:

Հայտնել էինք նաև, որ  դեպքից հետո Ս. Սարոյանի որդին ձերբակալվել էր, սակայն, մարզի դատախազի տեղակալի որոշմամբ, արգելանքից ազատ արձակվել: Թե ի՞նչ հիմքով է գեներալի որդին ազատ արձակվել, դատախազությունից ճշտել չհաջողվեց:

Մեր տեղեկություններով՝ առկա է տեսագրություն, որը փաստում է, որ միջոցառման ժամանակ կրակոցներ են հնչել: