Պետք ա գնաս էնտեղ, որ իմանաս. Սուրիկ Խաչատրյանը՝ որդու մասնակցությամբ հերթական միջադեպի մասին

Այսօր Սյունիքի մարզպետ Սուրիկ Խաչատրյանը ԱԺ-ում էր. մասնակցում էր համայնքների խոշորացման թեմայով լսումներին: Լսումներից հետո լրագրողները հարց ուղղեցին նրան, թե ինչո՞ւ է խուսափում Բուդաղյանների գործով դատավարությանը ներկայանալուց: Սուրիկ Խաչատրյանն այսպես արձագանքեց. «Բայց ես խի՞ պիտի խուսափեմ, չեն կանչել, եթե կանչեն, կգնամ»:

Լրագրողները նրանից հետաքրքրվեց նաև նրա որդու մասնակցությամբ երկու օր առաջ տեղի ունեցած ծեծկռտուքից, որի ժամանակ երկու սյունեցի եղբայրներ մարմնական տարբեր վնասվածքներ են ստացել: Ի պատասխան Խաչատրյանն ասաց, թե իր որդին գտնվում է Երևանում, և ինքը տեղյակ չէ:

Հարցին, թե ի՞նչ է կարծում, պե՞տք է քայլեր ձեռնարկել`  իր որդուն հասարակությունից մեկուսացնելու համար, քանի որ նա անընդմեջ հայտնվում է իրավապահների ուշադրության կենտրոնում, մարզպետը պատասխանեց. «Դա պետք ա գնաս էնտեղ, որ իմանաս, ոչ թե ստեղ քեզնից դուրս խոսես»: Հետո վստահեցեց, որ որդին մեղավոր չէ և ոչ մի միջադեպ էլ չի եղել:

Լրագրողների պնդմանը, թե ի՞նչն է պատճառը, որ որդու անունը մշտապես շոշափվում է տարատեսակ սկանդալային պատմություններում, Խաչատրյանը պատասխանեց, որ չգիտի, և չբացառեց, որ այդ ամենն իր դեմ է ուղղված: