Ինձ նշանակել է հանրապետության նախագահը. Արփինե Հովհաննիսյան

Այսօր արդարադատության նորանշանակ նախարար Արփինե Հովհաննիսյանը, լրագրողների հետ զրույցում պատասխանելով այն հարցին, թե արդյո՞ք վարչապետի գործոնն էր պատճառը, որ նշանակվեց նախարար, ասաց. «Հանրապետության նախագահն է նշանակում արդարադատության նախարարին»:

Նա հավելեց, որ, նախագահի կողմից լիազորվելով` աշխատել այդ  պաշտոնում,  ստանձնել է այդ բեռն ու պատասխանատվությունը:

Լրագրողները կրկին հարցրեցին, թե ինչո՞ւ, այնուամենայնիվ,  Հանրապետական կուսակցությունն առաջադրեց հենց իր թեկնածությունը:

«Ես չէ, որ պետք է անդրադառնամ ինձ նշանակելու հիմքերին: Այդպիսի քաղաքական որոշում է կայացրել Հանրապետական կուսակցությունը: Ես հարգում եմ այդ որոշումը, ես էլ արդեն աշխատում եմ այդ պաշտոնում: Կաշխատեմ իրականացնել այն հիմքերն ու բարեփոխումները, որոնք դրված են նախարարության քաղաքականության հիմքում»,- ասաց Արփինե Հովհաննիսյանը:

Դիտարկմանը, որ արդարադատության ոլորտն ամենակոռումպացվածն է, բարեփոխումների կարիք կա, նախարարը պատասխանեց. «Նախ` բոլորիցդ ուզում եմ ժամանակ խնդրել, որպեսզի ավելի մանրամասն, նախարարության յուրաքանչյուր ոլորտում առկա խնդիրների վերաբերյալ զրուցենք, խոսենք: Ստանձնելով այս պարտավորությունը, քաջ գիտակցելով, թե որ համակարգ եմ մուտք գործում, կարծում եմ` ավելի ուշ ժամանակ կունենանք անդրադառնալու ոլորտում առկա խնդիրներին ու այն տեսլականին, որը ես ունեմ ոլորտում առկա խնդիրները հաղթահարելու և այլ բարելավումներ անելու կապակցությամբ»: