Նախագահը Վրաստանի խորհրդարանի և Աջարիայի ինքնավար հանրապետության գերագույն խորհրդի ընտրությունները նշանակել է հոկտեմբերի 31-ին

Ընտրությունների նշանակման մասին այսօր արձակած կարգադրությամբ, նախագահ Սալոմե Զուրաբիշվիլին ընտրությունների օրը նշանակել է հոկտեմբերի 31-ին և դիմել բնակչությանը. 1tv.ge-ի փոխանցմամբ՝ հայտնում է Yerkir.am-ը:

«Այսօր ես ստորագրեցի ընտրությունները հայտարարող ակտը: Մեր երկրում խորհրդարանական ընտրությունները տեղի կունենան հոկտեմբերի 31-ին, ինչպես նախատեսված է մեր սահմանադրությամբ: Ես կցանկանայի դիմել հասարակությանը և հորդորել հնարավորինս խաղաղ անցկացնել այս ժամանակահատվածը: Այսօրվա պայմաններում, երբ մենք արդեն անցել ենք կովիդի համավարակը  և բավականին բարդ տարի էր, անհրաժեշտ է շատ հանգիստ պատրաստվել ընտրություններին:

Այս ընտրություներն ունեն առանձնահատուկ նշանակություն: Մենք դրանով հնարավորություն ունենք վերահաստատել մեր երկրի ժողովրդավարությունը: Այնպես ինչպես մի քանի ամիս առաջ, մենք կարողացանք ցույց տալ աշխարհին, որ կարող ենք կառավարել այսպիսի խիստ համավարակ և որ մենք պատասխանատու քաղաքացիներ ենք: Հենց այսպես պետք է անց կացնենք ընտրությունները:

Գիտեմ և հավատում եմ, որ կարող ենք գալիք ընտրությունները անց կացնել խաղաղ և թափանցիկ:

30 տարի առաջ,  1990 թվականի հոկտեմբերի 28-ին, Վրաստանում անց են կացվել ժողովրդավարական ընտրություններ: Մենք պետք է շարունակենք այս ավանդույթը, ամրապնդենք այն և աշխարհին ներկայանանք որպես ծայրահեղ ժողովրդավարական երկիր: Մենք դա կարող ենք անել,- ասել է նախագահը: