Դիրիժորությունը կախարդական մասնագիտություն է. Զուբին Մեթան Հայաստանում է

Վաղն Ալ. Սպենդիարյանի անվան օպերայի և բալետի ազգային ակադեմիական թատրոնում համերգով հանդես կգա Իսրայելի ֆիլհարմոնիկ նվագախումբը` Զուբին Մեթայի ղեկավարությամբ: Համերգը տեղի է կունենա \"Երևանյան հեռանկարներ\" փառատոնի շրջանակներում և այն նվիրվում է Ցեղասպանության 100-րդ տարելիցին:

Այսօր լրագրողների հետ հանդիպման ժամանակ Մեթան նշեց, որ չնայած առաջին անգամ է Հայաստանում, սակայն մի շարք հայ ընկերներ ունի: Ավելին, Մեթայի հայրը Նյու Յորքում սովորել է Իվան Ղալումյանի մոտ.«Այդկերպ ես մի փոքր շփում եմ ունեցել հայ համայնքի հետ: Ի դեպ, ծանոթ եմ նաև ջութակահար Հայկ Բալյանին, ով մեր վերջին հանդիպման ժամանակ համեղ հայկական ճաշատեսակ էր ինձ համար պատրաստել: Ես, բնականաբար, գիտեմ նաև Արամ Խաչատրյանին, բայց, ցավոք, ժամանակակից կոմպոզիտորներին ծանոթ չեմ»: Մաեստրոյի կարծիքով` բնական է, որ Ցեղասպանության 100-րդ տարելիցին անդրադառնում ենք նաև երաժշտության միջոցով, քանի որ, ըստ նրա, հայերս տաղանդավոր ազգ ենք: Խոսելով դիրիժորության մասին` Մեթան նշեց, որ այն կախարդական մասնագիտություն է.«Տեսեք` մենք ոչնչի չենք դիպչում, ոչինչ չենք նվագում, ուղղակի ղեկավարում ենք գաղափարը` բոլորին միացնող, իսկ արդյունքն ինքներդ եք տեսնում\":

Ի դեպ, Մեթան և Իսրայելի ֆիլհարմոնիկ նվագախմբի երաժիշտները վաղը կայցելեն Ծիծեռնակաբերդի հուշահամալիր` հարգանքի տուրք մատուցելու զոհերի հիշատակին: