Վթարված միկրոավտոբուսը ՊՆ-ից «խնդրել էին»`«Միասին» ճամբարի մասնակիցներին տեղափոխելու համար

Արդեն տեղեկացրել ենք, որ երեկ`օգոստոսի 17-ին, Գեղարքունիքի մարզի Սևան-Գավառ ավտոճանապարհի 3-րդ կմ-ում ՊՆ-ին պատկանող միկրոավտոբուսը դուրս է եկել ճանապարհի երթևեկելի հատվածից և շրջվել: Նշենք, որ դրանով երեխաներ են տեղափոխել:

ՀՀ ՊՆ մամուլի խոսնակ Արծրուն Հովհաննիսյանը yerkir.am-ի հետ զրույցում նշեց, որ վերոնշյալ միկրոավտոբուսը ՊՆ-ից «խնդրել են»` «Միասին» ճամբարի մասնակիցներին տեղափոխելու համար: «Միկրոավտոբուսով «Միասին» ճամբարի մասնակիցներին էին տեղափոխում, ես չգիտեմ` թե ուր էին նրանք գնում, պարզապես մեզ խնդրել էին մեքենա տրամադրել, մենք էլ տրամադրել էինք»,- ասաց Հովհաննիսյանը: Նշենք, որ մեր տեղեկություններով` վթարված միկրոավտոբուսի վարորդի ինքնազգացողությունը վատացել է, ինչի հետևանքով էլ տեղի է ունեցել վթարը:

Հիշեցնենք նաև, որ վթարի ենթարկվածների կյանքին վտանգ չի սպառվում, նրանք ապաքինվում են: