Վաղն էլ կարող է ասեն` Եղեռնի հուշահամալիրն ավելորդ է

Հրապարակախոս Կարինե Հակոբյանն այսօր լրագրողների հետ հանդիպման ընթացքում անդրադարձավ Մարզահամերգային համալիրի վաճառքին ու համալիրի տարածքում նախատեսված ժամանցի վայրերի կառուցմանը: «Շատ լավ կլիներ, որ այնպիսի որոշումներ ընդունվեն, որտեղ հանրության կարծիքը ևս առկա է: Խաղատների մասին օրենքն այնքան տխրահռչակ է, որ դրա վատ հետևանքներն անընդհատ ենք տեսնելու: Համալիրն ավագ սերնդի համար նվիրական կառույց է և այն պետք է ազգայնացվի: Օրինակ ես այդպես էլ չհասկացա, թե ինչու տվեցին այն ՊՆ-ին»,- ասաց Հակոբյանը: Նրա կարծիքով` համալիրը պետք է հանձնվի Մշակույթի նախարարությանը: Հրապարակախոսի դիտարկմամբ` Մարզահամերգային համալիրի շինությունը հենց սկզբից պետք է ավելի մոտ կառուցվեր փողոցին: Ըստ նրա, այդ կերպ համալիրն ավելի հեռու կլիներ Հայոց ցեղասպանության թանգարանից: «Իսկ ինչ վերաբերում է խաղատներին, պետք է ասեմ, որ այն մի յուրօրինակ միջավայր է պահանջում և ժողովրդին մոտ բերելը պարզապես աններելի է: Այս ամենը կատարվում է, քանի որ բավարարար աղմուկ չի բարձրանում: Որ այսպես գնա, վաղն էլ կարող է ասեն, որ Եղեռնի հուշահամալիրն ավելորդ է, կամ էլ կարող են Օպերան հյուրանոց դարձնել»,- ասաց Կարինե Հակոբյանը: