Վաղն էլ կարող է Գռզոյին բերեն, դնեն տնօրեն, ոչինչ չեմ բացառում. Վահե Հակոբյան. «Փաստինֆո»

Զանգեզուրի պղնձամոլիբդենային կոմբինատը տնօրենների խորհուրդ չունի, ունի կառավարման խորհուրդ: Այս իշխանությունները մոտավորապես չեն էլ պատկերացնում՝ ԶՊՄԿՆ-ն իրենից ի՞նչ է ներկայացնում, կառավարման ի՞նչ համակարգ ունի: «Փաստինֆո»-ի հետ զրույցում ասաց «Հայաստան» խմբակցության պատգամավոր Վահե Հակոբյանը՝ անդրադառնալով Կառավարության հայտարարությանը, որ քննարկվում է Տիգրան Ավինյանին ԶՊՄԿ տնօրենների խորհրդի անդամ նշանակելու հարցը:

Վահե Հակոբյանը պատգամավոր դառնալուց անմիջապես հետո դադարեցրել էր Զանգեզուրի պղնձամոլիբդենային կոմբինատի խորհրդի անդամի պաշտոնը, քանի որ այն անհամատեղելի էր պատգամավորական գործունեության հետ:
Վահե Հակոբյանը ենթադրում է, որ Տիգրան Ավինյանը կոմբինատում կզբաղեցնի այն պաշտոնը, որն ինքն էր զբաղեցնում մինչ պատգամավոր դառնալը.

«Ռեկետի շնորհիվ կարողացան բանավոր ունենալ 15% բաժնեմաս կոմբինատում, շեշտում եմ՝ բանավոր, քանի որ այլ հաստատում ես չունեմ, որևէ փաստաթղթում չի ֆիքսվել այդ 15%-ի փոխանցումը պրն Տրոցենկոյի կողմից: Իսկ 15%-ի բաժնետերը կարող է խորհրդում ունենալ ներկայացուցիչ, բայց ոչ մի արտառոց բան չի կատարվում: Ենթադրում եմ պրն Ավինյանը կնշանակվի հենց իմ պաշտոնին, որը ես էի զբաղեցնում կոմբինատի կառավարման խորհրդում»,-ասաց Վահե Հակոբյանը։
Պատգամավորը չբացառեց, որ Ավինյանը նշանակվի խորհրդի անդամ՝ հետագայում կոմբինատի տնօրեն նշանակվելու նպատակով, միևնույն ժամանակ ընդգծեց՝ Ավինյանը չունի համապատասխան ունակություններ՝ կոմբինատը տնօրինելու համար.
«Եթե ուզում են այդ հիմնարկը վերջնական քանդեն, թող այդպես անեն: Ես այս կառավարությունից ոչինչ չեմ բացառում , այս կառավարությունը շարժվում է մեկ անձի ամբիցիաները բավարարելու համար այստեղ լոգիկան լրիվ բացակայում է, վաղը կարող է Գռզոյին բերեն դնեն տնօրեն»,-ասաց Հակոբյանը և հավելեց. «Այստեղ ունակությունների մասին է խոսքը, Ավինյանը տնօրեն չի կարող աշխատել, իսկ կառավարման խորհրդում ընդամենը նստելու է, դեմքի խելոք արտահայտություն ընդունի և երբ հարկավոր է՝ ձեռք բարձրացնի՝ կողմ կամ դեմ քվեարկի, դա է լինելու իր ֆունկցիան»,-ասաց Վահե Հակոբյանը:

Վերջինիս խոսքով՝ բացի նրանից, որ ԶՊՄԿ-ի բաժնետոմսերը Կառավարությանը նվիրաբերելու գործարքը բանավոր է եղել, կան մի շարք այլ անհասկանալի հարցեր եւս: Հայտնի չէ՝ ի՞նչ սկզբունքով է փոխանցվել կոմբինատի բաժնեմասը, ի՞նչ գումարով է գնվել այն և ինչի՞ դիմաց է եղել գործարքը, զրուցակիցը չբացառեց՝ ոմանց կալանավորելու կամ ազատ արձակելու նախապայմանով.
«Մենք ոչինչ չենք տեսնում, 60%-ը, որ պրն Տրոցենկոն գնել է, ի՞նչ գումարով է գնել՝ չգիտենք, ինչո՞ւ է ինքը որոշել 15%-ը նվիրաբերել Կառավարությանը, այն էլ՝ Կառավարությունը չի ղեկավարելու, այլ ինչ- որ հիմնադրամ, ինչի՞ դիմաց է նվիրաբերել, ի՞նչ պայմանավորվածություն է ձեռք բերվել, ո՞ւմ են կալանավորելու, ո՞ւմ չեն կալանավորելու,ու՞մ են ազատ արձակելու: Այնքան հարցեր կան, որոնց պատասխանները դեռ երկար ժամանակ փորձելու ենք ստանալ, այս խմորը դեռ շատ ջուր է քաշելու»,-ասաց Հակոբյանը:

Ընդդիմադիր պատգամավորը շեշտեց, որ ԶՊՄԿ-ի բաժնետերերը ճնշման են ենթարկվել Նիկոլ Փաշինյանի կողմից, ինչի արդյունքում էլ որոշել են բաժնեմասերը նվիրաբերել Կառավարությանը.

«Նիկոլը ռեկետի շնորհիվ բավարարում է իր ամբիցիաները: Մի քիչ հետ գնանք, Կապանում քարոզարշավի ժամանակ հայտարարեց՝ կոմբինատը տանում եմ ազգայնացման, ինքը չի կարող տանել ազգայնացման, ինքը ընկավ խնդրի մեջ, այդ խնդրից դուրս գալու համար բոլոր բաժնետերերին դրեց պրեսինգի տակ, բաժնետերերից ոմանք չդիմացան պրեսինգին և որոշեցին իրենց բաժնեմասը ծախել «Գեոպրոմայնինգ»-ին, այն նախապայմանով, որ «Գեոպրոմայնինգ»-ը բաժնեմասերի 15%-ը զիջելու է պետությանը, սա է տեղի ունեցել՝ պետական ռեկետ»,-արձանագրեց Վահե Հակոբյանը:

Աղբյուրը՝ Փաստինֆո