«Զվարթնոց»-ի շենքը չպետք է քանդել. Մկրտիչ Մինասյան

Այսօր` լրագրողների հետ հանդիպման ժամանակ, Հայաստանի ճարտարապատների միության նախագահ Մկրտիչ Մինասյանը խոսել է «Զվարթնոց» օդանավակայանի շենքի հետագա ճակատագրի մասին:

Նրա խոսքով` իրականությանը չի համապատասխանում այն, որ «Զվարթնոց» օդանավակայանի ուղևորային հին համալիրը վթարային վիճակում է: Ճարտարապետի համոզմամբ` պետք է պարզապես ամրացնել շենքը, հարմարեցնել այսօրվա պայմաններին, այլ ոչ թե քանդել: Մկրտիչ Մինասյանը նշեց, որ «Զվարթնոց»–ի վերանորոգման համար անհրաժեշտ է մոտ 10 միլիոն դոլար։

«Հայաստանը շատ անփույթ է պատմական կառույցների նկատմամբ: Հին շենքերը անհրաժեշտ են, որովհետև դրանք փայլուն կառույցներ են: Տարօրինակ է, որ շենքի մի մասը քանդվում է, մյուս մասը փոխում են։ Եվ եթե իշխանությանը  չի հետաքրքրում այս խնդիրը, ներդրողներին ընդհանրապես չի հետաքրքրի, որ  կառույցը պահպանեն։ Կարծես թե դժվար է պահպանել, բայց հեշտ է քանդել ու նորը կառուցել»,- ասաց Մկրտիչ Մինասյանը:

Ճարտարապետների միությունը ՀՀ կառավարությանն առաջարկելու է  «Զվարթնոց» օդանավակայանի հին մասնաշենքի պահպանման և օգտագործման հարցում ներգրավել նաև կառույցի հեղինակներին և Հայաստանի անվանի ճարտարապետներին: