Նախագահը 12 մլն է տրամադրում, որ 14-ով ծախի՞ շենքը. Սունդուկյանի անվան թատրոնի շենքը չի՛ վաճառվում

Newsbook.am-ի տեղեկություններով` Սունդուկյանի անվան ազգային ակադեմիական թատրոնի արտադրական մասից մի ահռելի հատված մոտ օրերս օտարվելու է «Renco» ընկերությանը:

Yerkir.am-ի հետ զրույցում թատրոնի տնօրեն Ստեփան Դավթյանը նշեց, որ լուրն ամենևին էլ չի համապատասխանում իրականությանը:

«Ժամանակին էլ գրել էին, որ «Sharm»-ն է գնել մեր շենքը, չտեսանք` առածն ի՞նչ եղավ: Բանն այն է, որ ասում են, թե նախագահն է կանգնած թատրոնի շենքի «վաճառքի» հետևում: Գիտե՞ք` անցած տարի, երբ Օպերայի վերանորոգման աշխատանքներն էին կատարվում, պետք է որոշվեր, թե հաջորդը որ մշակութային օջախն է բարեկարգվելու: Սունդուկյանի թատրոնը հարցականի տակ էր դրված` կլինի՞, թե՞ ոչ, պարզ չէր, բայց նախագահի կոպիտ պնդմամբ` թե այս ի՞նչ եք ասում` Մայր թատրոնը թողած, մեկ ուրիշ թատրոն հո չի՞ լինի, թատրոնն ընդգրկվեց պետական աջակցությամբ վերանորոգման ծրագրի մեջ»,- ասաց թատրոնի տնօրենը` հավելելով, որ նախնական հաշվարկների համաձայն` 7-8 մլն եվրո է տրամադրվելու թատրոնի վերանորոգման համար:

«10-12 մլն դոլարի մասին է խոսքը, այսինքն` նախագահը 12 մլն տրամադրում է մեզ, որ 14 միլիոնով ծախի՞ շենքը: Այս ամենն ուղղակի ծիծաղելի է»,- ասաց Դավթյանը:

Նա նշեց նաև, որ տարօրինակ է նաև կազմակերպության ընտրությունը: Դավթյանի կարծիքով` հավանաբար, «Renco»-ի մասին են խոսում այն հաշվարկով, որ նախկին հեծանվահրապարակի մասում հենց այդ ընկերությունն էր շինարարություն իրականացնում: