Զինծառայողներին քաղցած են պահել. ՀՀ-ում ռուսաստանյան ռազմաբազայում խոշոր հափշտակություններ են բացահայտվել

Դոնի Ռոստովի կայազորային դատարանը կալանքի տակ է առել Հարավային ռազմական շրջանի պարենի ծառայության պետի նախկին տեղակալ գնդապետ Դենիս Զորինին. հայտնում է РЕГНУМ-ը:

Զորինը մեղադրվում է կազմակերպված խմբի կազմում, խաբեությամբ, ՀՀ-ում տեղակայված ավիաբազայի կարիքների համար նախատեսված պարենի հափշտակության մեջ: Ըստ Donday պորտալի՝ հափշտակվել է ավելի քան 450 միլիոն ռուբլի:

Հափշտակության բազմաթիվ փաստերը բացահայտվել են Գյումրիում Ավետիսյանների դաժան սպանության գործի հետաքննության ընթացքում, մեղադրյալը Գյումրիի  ռուսական ռազմաբազայի զինծառայող Վալերի Պերմյակովն է:

Հետաքննության ժամանակ սարսափելի մանրամասներ են բացահայտվել: Նշվում է, որ զինծառայողները քաղցած են մնացել, նրանք անգամ լքել են զորամասը՝ սնունդ որոնելու համար: Պարզվել է, որ Հայաստանում գործել է պարենի հափշտակության եւ այն շուկաներում և մեծածախ ցանցերում իրացնելու համակարգ: Հետաքննության արդյունքում հաջողվել է դուրս գալ Զորինի վրա: