ՀԷՑ-ի ներդրումային ծրագիրն ընդունվեց. Բիբինը լարված է

Արդեն տեղեկացրել ենք, որ Հանրային ծառայությունները կարգավորող հանձնաժողովը հրապարակել է 14 տարբեր որոշումների նախագծեր, որոնց հանրագումարում պատրաստվում է ՀԷՑ-ին տուգանել 75 միլիոն դրամի չափով: Բացի այդ` նախատեսվում է հավանության արժանացնել ՀԷՑ-ի ներդրումային ծրագիրը:

ՀԾԿՀ նիստին ներկա է նաեւ ՀԷՑ տնօրեն Եվգենի Բիբինը, սակայն զեկույցը ներկայացրեց ոչ թե նա, այլ ՀԷՑ սակագնային քաղաքականության բաժնի ներկայացուցիչը: Նա հատուկ մատնանշեց ՀԷՑ-ի ներդրումային քաղաքականությունը, թե որքան ներդրումներ են արվել և որքան ներդրումներ են պատրաստվում իրականացնել՝ պատշաճ էներգամատակարարում ապահովելու համար:

Նիստին ներկա ՀԿ-ներից մեկի ներկայացուցիչը հարց ուղղեց ՀԷՑ ներկայացուցչին, թե ի՞նչ կփոխվի սպառողի համար, երբ այդ 8,5 միլիարդ դրամի ներդրումն արվի, և ինչպե՞ս դա կանդրադառնա սակագնի վրա: ՀԷՑ ներկայացուցիչը պատասխանեց, որ իր ելույթում դրան արդեն անդրադարձել է և ևս մեկ անգամ անդրադառնալու կարիք չկա, սակայն նշեց, որ սակագնի վրա ազդեցություն կլինի 0,3 դրամի չափով:

ՀԾԿՀ նախագահ Ռոբերտ Նազարյանն էլ նշեց, որ գնահատականները հնարավոր կլինի տալ միայն այն ժամանակ, երբ արդեն իրականացվի ներդրումային ծրագիրը:

Խոսեց նաև ՀԷՑ տնօրեն Եվգենի Բիբինը: Նա նշեց, որ ներդրումային ծրագիրը, որը ներկայացվել է ՀԾԿՀ ուշադրությանը, ունի սուղ ժամանակ` իրագործվելու համար, սակայն հույս հայտնեց, որ ՀԷՑ-ը կիրականացնի այդ ներդրումային ծրագիրը բոլոր այն ցուցանիշներով, որոնք ներկայացված են ծրագրում:

Ռոբերտ Նազարյանը ՀԷՑ-ի ներդրումային ծրագիրը դրեց քվեարկության, և այն ընդունվեց:

Նշենք, որ Եվգենի Բիբինն իր խոսքում խիստ կաշկանդված էր, լարված ու սակավախոս: